Eki ıt talaǵan qyzdyń ólimine qatysty polıtsııa túsinik berdi
ALMATY. QazAqparat - Almaty polıtsııasy ıtter talap óltirgen 3 jasar qyzdyń ólimine qatysty túsinik berdi, dep habarlaıdy QazAqparat tilshisi.
Alataý aýdandyq polıtsııa basqarmasy qaıǵyly oqıǵaǵa baılanysty QR QK 104-baby boıynsha sotqa deıingi tergeý isi reestrine tirkeýge aldy.
«Úsh jastaǵy qyzdy óz aýlasynda rotveıler tuqymdas eki ıti talaǵan. Qaıǵyly oqıǵa bolǵan kezde ákesi úıde bolǵan. Veterınarlyq qyzmet ókilderi ıtterdi aýlap, alyp ketti. Іs boıynsha saraptama taǵaıyndaldy. Bolǵan oqıǵanyń mán-jaıy anyqtalyp jatyr», - dedi Polıtsııa departamentiniń resmı ókili Saltanat Ázirbek.
Atalǵan bap boıynsha eger ıt ıesi kináli bolsa, ol 5 jylǵa deıin bas bostandyǵynan aırylýy múmkin.
Eske salsaq, Samǵaý shaǵyn aýdanynda bolǵan qaıǵyly oqıǵa týraly buǵan deıin habarlaǵan bolatynbyz.
