«Eki ezý» estradalyq mınıatıýra teatry elordalyq kórermenderge jańa baǵdarlamasyn usyndy
ASTANA. 8 qarasha. QazAqparat - Keshe «Eki ezý» estradalyq mınıatıýra teatrynyń ujymy Astanadaǵy «Jastar» saraıyna jınalǵan elordalyq kórermenderge jańa baǵdarlamasyn usyndy.
Bul ujym 1998 jyly Aqtóbe qalasynda alǵashqyda kúlki klýby bolyp qurylǵan. Ádemi ázil-qaljyńymen elge tanylǵan «Eki ezý» ázil-syqaq teatry 2011 jyldyń sáýirinde Aqtóbe oblystyq ákimdiginiń qoldaýymen memleket quzyryna ótip, estradalyq mınıatıýra teatry mártebesine ıe boldy.
Jańa baǵdarlamada ujymnyń tanymal ártisteri qoǵamdaǵy keleńsiz jaılardy sahnaǵa shyǵardy.
Teatr dırektory, kórkemdik jetekshisi Nurlybek Jubatqan bastaǵan ónerli ujym astanalyq kórermenderdiń yqylasyna bólendi.
Aıta ketý kerek, bul teatrdyń suramshaq kórshi týraly ıntermedııasy kórermenderge jaqsy tanymal. Bul joly ártister «Osy ıntermedııany elimizdiń drama teatrlary sahnaǵa shyǵarǵan eken» dep týyndydan jańasha túrlengen úzindi kórsetti. Odan keıin «Osy ıntermedııa negizinde «Qazaq fılm» stýdııasy fılm túsirgen eken» dep kıno túrindegi kórinisti usyndy. Áserli shyqqan kórinister kórermenderdiń kóńilinen shyqty.
