Eki elden zeınetaqy alyp kelgen SQO turǵyny zańsyz alǵan aqshany qaıtarmaq
SQO soty baspasóz qyzmetiniń málimetinshe, 5 balasy bar áıel Eńbek, halyqty áleýmettik qorǵaý jáne kóshi-qon komıtetiniń SQO boıynsha departamentin sotqa bergen. Oǵan 2020 jyldyń 1 jeltoqsanynan bastap zeınetaqy berý toqtatylǵan.
Sot áıelge memlekettik organnyń sheshimimen eki memlekettiń – Qazaqstan Respýblıkasy men Reseı Federatsııasy aýmaǵynda zeınetaqy tólemderin eki ret alyp kelýine baılanysty zeınetaqy berýdiń toqtatylǵanyn anyqtady. Kórshi memleketten Qazaqstanǵa qonys aýdarǵan zeınetker zeınetaqy men áleýmettik aýdarymdardy resimdeý barysynda basqa vedomstvodan zeınetaqy jáne áleýmettik tólemder taǵaıyndalmaǵandyǵy týraly jalǵan aqparat bergen.
«Reseı Federatsııasynda talapker 2009 jyldyń 10 sáýirinen bastap 5 balasy bar kóp balaly ana retinde zeınetaqy alýshy bolǵan. Qazaqstan Respýblıkasynyń azamattyǵyn qabyldaǵannan keıin de talapker Reseı Federatsııasynda taǵaıyndalǵan zeınetaqyny alýdy jalǵastyrdy. Al 2014 jylǵy 22 qyrkúıekten bastap QR zeınetaqy ala bastady jáne 2016 jylǵy 30 sáýirge deıin eki memlekettiń aýmaǵynda zeınetaqy alyp kelgen», - deıdi baspasóz habarlamasynda.
1992 jylǵy 13 naýryzdaǵy «TMD-ǵa qatysýshy memleketter azamattarynyń zeınetaqymen qamsyzdandyrý salasyndaǵy quqyqtarynyń kepildikteri týraly» kelisimge sáıkes, zeınetker kelisimge qatysýshy memleketter sheginde qonys aýdarǵan kezde, zeınetaqy túri zeınetkerdiń jańa turǵylyqty jeri boıynsha zańnamada kózdelse, burynǵy turǵylyqty jeri boıynsha zeınetaqy tóleý toqtatylady.
Kóp balaly ananyń zeınetaqysyn eki memleket te birtindep tóleýdi toqtatqan, bul talapkerdiń pikirinshe, onyń zeınetaqy alý quqyǵyn buzdy.
Sotta taraptar tatýlasý týraly kelisimge keldi.
Endi departament 2021 jylǵy 20 qyrkúıekke deıin memlekettik zeınetaqy tólemin taǵaıyndaý týraly sheshimdi qaraýǵa jáne bekitýge mindetti. Áıeldiń 2020 jylǵy 1 jeltoqsannan bastap almaı kelgen zeınetaqysyn osy jyldyń qazan aıynda berýi tıis.
Al sotqa aryzdanǵan áıel óz kezeginde 2014 jyldyń 22 qyrkúıegi men 2016 jyldyń 30 sáýiri aralyǵynda zańsyz alynǵan zeınetaqy tólemderiniń sommasyn - 726 230 teńgeni kelesi jyldyń 1 maýsymyna deıingi merzimde qaıtarýǵa mindettendi.