Eki balanyń ólimi: Órt sóndirýshiler jabyq turǵan esikti buzyp kirdi
AQTÓBE. QazAqparat - Aqtóbe oblystyq tótenshe jaǵdaılar qyzmeti eki balanyń ólimimen aıaqtalǵan órt oqıǵasyna qatysty túsinikteme berdi. Órt týraly aqparat kesh berilgen, dep habarlaıdy QazAqparat tilshisi.
Aqtóbe oblysy Hromtaý qalasynda órt bolyp, bes qabatty úıdiń úshinshi qabatynda páter órtendi. Órt sóndirýshiler eki balanyń máıitin taýyp, jedel aýrýhanaǵa jibergen. Biraq olardy qutqaryp qalý múmkin bolmady. Ýly gazǵa tunshyqqan balalar mert boldy.
«Órt týraly habar polıtsııadan túsip, eki órt sóndirý kóligi jiberildi. Arada 4 mınýt ótkende órt sóndirýshiler jetip, jumystaryn júrgizdi. Úshinshi qabatqa kóterilgen kezde tútin ıisi qatty shyǵyp jatty. Órt sóndirýshiler arnaıy kıimmen ishke kirip, aldymen as bólmesin, keıin balalar bólmesi men qonaq bólmege ótti. Eki bala esikti kilttep alǵan, ájethana men vannadan keıingi bólmede jatty. Es-túzsiz jatqan balalar dalaǵa shyǵarylǵanymen, aman alyp qalý múmkin bolmady», - dedi Aqtóbe oblystyq TJD bastyǵynyń orynbasary Ernur Ótegenov.
Qazirgi kezde órttiń shyǵý sebebi anyqtalyp jatyr. Talap boıynsha tergeý jumystaryn ishki ister organdary júrgizedi.
«Órt sóndirýshiler oqıǵa ornyna jetkenshe barlyq kıimderin kıip, daıyn bardy. Ol jerde páter ishine kirgen qyzmetkerler qural-jabdyqsyz barǵan emes. Bári jedel, ereje boıynsha jumys istedi», - dedi Ernur Ótegenov.
Eske salsaq, Hromtaý aýdanyndaǵy páter ishinen shyqqan órt kezinde 4 jáne 9 jastaǵy eki bala qaza tapty. Ekeýi eki otbasynyń balalary, bir-birine bóle bolyp keledi.
