Eki balany qutqarǵan jasóspirim «Órtte kórsetken qaısarlyǵy úshin» medalimen marapattaldy
ShYMKENT. QazAqparat - Shymkentte órtten eki balany qutqaryp qalǵan jasóspirimdi qalanyń bas polıtseıi qabyldady. Polıtsııa departamentiniń bastyǵy 13 jastaǵy Baqytjan Berkimbaevty QR Іshki ister mınıstri polıtsııa general-maıory Erlan Turǵymbaevtyń buıryǵymen «Órtte kórsetken qaısarlyǵy úshin» medalimen marapattady, dep habarlaıdy QazAqparat tilshisi.
Polıtsııa departamentiniń bastyǵy Eraly Jumahanbetov batyr bala Baqytjannyń ata-anasyna da «Adam ómirin qutqarýda erlik jasaǵan balasyna úlgili ári ónegeli tárbıe bergeni úshin» Alǵys hatyn tabystady. Kezdesý barysynda departament bastyǵy óziniń jáne jeke quramnyń atynan tárbıe bergen ata-anasyna jáne ustazdaryna alǵys bildirip, Baqytjannyń erligi men erjúrektiginiń arqasynda barlyq qurdastaryna úlgi bolǵanyn atap ótti. Sondaı-aq, vedomstvo basshysy Baqytjanǵa bolashaqta polıtseı mamandyǵyn tańdasa, óz tarapynan qoldaý kórsetip, yqpal etetinin jasyrmady. 
Eske sala keteıik, segizinshi synypta oqıtyn Baqytjan otqa oranǵan úıge qoryqpaı kirip, bir shette búrisip otyrǵan 6 jasar qyzdy jáne 3 jasar balany dalaǵa alyp shyqqan bolatyn. Bul oqıǵaǵa deıin qolyn syndyryp alǵanyna qaramastan ol osylaısha er azamatqa tán erlik jasady.
