Eki balany qaǵyp óltirgen kólik júrgizýshisi segiz jylǵa sottaldy
ALMATY. 8 maýsym. QazAqparat /Ádilet Musahaev/ - Almatyda jarty jyl buryn jeti jasar eki balany qaǵyp ketken «BMV» kóliginiń júrgizýshisi segiz jylǵa bas bostandyǵynan aıyryldy.
Esterińizde bolsa, jol-kólik apaty 4 qańtar kúni Almatynyń Jetisý aýdanynda oryn alǵan edi. Birinshi synypta oqıtyn eki bala óz úıleriniń mańynda oınap júrip, kólik astyna túsken bolatyn. Jerdiń taıǵaqtyǵyna jáne jyldamdyqty azaıtý belgisine qaramastan «BMV» qatty júrip kele jatqan.
«Ókinishke qaraı, balalar jedel járdem kómegi jetpeı kóz jumdy. Olar óte qatty soqqy alǵan. «BMV» kóliginiń júrgizýshisi balalarǵa kómektesýdi oılamastan, ol jerden izin sýytqan. Avtokólik bólshekterin tapqan krımınalıster jasyrynǵan kóliktiń markasy men túsin anyqtady. Sol kezden bastap JPB ınspektorlary alǵan aıǵaqqa baılanysty Almatydaǵy «BMV» kólikterin teksere bastady jáne qashqyn júrgizýshini quryqtady», -deıdi Almaty qalasy ІІD-niń Jol polıtsııa basqarmasy bastyǵynyń orynbasary, polıtsııa polkovnıgi Muhtar Túsipov.
25 jastaǵy Vadımniń kinási tergeý jumystary boıynsha tolyqtaı dáleldendi. Tergeý barysynda ol balalardyń aıaq astynan shyǵa kelgendigin alǵa tartyp jáne jaýapkershilikke tartylýdan úreılenip, oqıǵa bolǵan jerden bas saýǵalaǵandyǵyn aıtyp aqtalmaq bolǵan.
"Sot júrgizýshiniń rýlge otyrmas buryn barlyq qaýipsizdikti eskerý kerektigin, sonyń ishinde qalada óz kóligin baqylaı alatyn tómen jyldamdyqpen júrý kerektigin nazarǵa aldy. Oǵan qosa «BMV» kóligi júrý baǵytyna qarsy júrgen. Qaıtys bolǵan balalardyń ata-anasy kinálini qatań jazalaýdy talap etti», -deıdi ІІD-niń baspasóz qyzmetiniń bastyǵy, polıtsııa kapıtany Saltanat Ázirbekova.
