Eki aıǵa jetpeıtin ýaqyttyń ishinde 15 iri qara, 4 ıt jáne 1 túlki qutyrǵan - BQO
ORAL. 20 aqpan. QazAqparat - Mal sharýashylyǵyn damytýda maldárigerlik sharalardy ýaqtyly atqarý mańyzdy ról atqarady.
Bul týraly oblys ákiminiń orynbasary Serik Súleımenniń qatysýymen ótken keńeıtilgen keńeste aıtyldy.
Ótken jyly Maldárigerlik baqylaý jáne qadaǵalaý komıtetiniń oblys-aýdandarda aýmaqtyq bólimsheleri qurylǵany belgili. Barlyq aýdandarda aldyn alý sharalaryn júrgizetin maldárigerlik stansalar ashyldy. Aýmaqtyq ınspektsııa bastyǵy Serik Qanatbaevtyń aıtýynsha, 2012 jyly epızootıkaǵa qarsy sharalarǵa respýblıkalyq bıýdjetten 405 mln. astam teńge bólindi, bul aldyńǵy jylǵydan 37 paıyzǵa kóp. Juqpaly indetterdiń aldyn alýǵa oblystyq qazynadan 15 mln. teńge jumsaldy. Alaıda, júrgizilgen sharalarǵa qaramastan, 15 eldi mekende asa qaýipti aýrýlar oshaǵy tirkeldi. Maldyń brýtsellezge shaldyǵýy barlyq derlik aýdanda kezdesedi. Tipti asyl tuqymdy 29671 bas maldyń 139-ynan brýtsellez derti shyqty. Oǵan qosa oblystyq memsanepıdqadaǵalaý departamentiniń málimetine sáıkes ótken jyly 55 adam osy keseldi juqtyrdy.
Qutyrý aýrýynyń kóbeıýi de alańdatady. Ótken jyly Terekti aýdanynda onyń eki, Bókeı ordasynda bir oshaǵy tirkeldi. Bıyl eki aıǵa jetpeıtin ýaqyt ishinde alty aýdanda qutyrý kezdesip otyr. Atap aıtqanda, 15 iri qara, 4 ıt jáne 1 túlki qutyrǵan.
Mamandar qaýipti keselderdiń kóbeıýin dári egýge qarjynyń jetkiliksiz bólinýimen túsindiredi. Bólingen qarjy jyl saıyn maldyń 50 paıyzyna jetedi de, qalǵany egilmeı qalady.
Oblystyq aýyl sharýashylyǵy basqarmasy maldárigerlik bóliminiń bastyǵy Qazbek Tashımovtiń sózine qaraǵanda, bıyl aldyn alý jumystary ýaqtyly bastalmaqshy. 2013 jyly maldárigerlik stansalaryn jaraqtandyrýǵa 629 mln. teńge bólinip otyr. Osy qarjyǵa barlyq qajetti qural-jabdyq satyp alynbaqshy. Pılottyq joba retinde 7 ınsınerator (bıologııalyq qaldyqtardy joıatyn arnaıy jabdyq) satyp alý kózdelýde.
