Eki áıeldi otadan soń óltirip alǵan hırýrgke sot klınıkalyq em jasaýǵa tyıym saldy
ALMATY. QazAqparat - Almaty qalalyq Qoǵamdyq densaýlyqty saqtaý departamenti plastıkalyq hırýrg Dmıtrıı Pısarevtiń klınıkalyq em jasaýyna sot arqyly tyıym saldy, dep habarlaıdy QazAqparat tilshisi sot zalynan.
Hırýrgtyń ota ústelinde byltyr eki áıel kóz jumǵan bolatyn.
«Qalalyq Qoǵamdyq densaýlyq saqtaý departamentiniń plastıkalyq hırýrg Dmıtrıı Pısarevtiń plastıkalyq salada klınıkalyq praktıkamen aınalysýyna, onyń jumysyn zańsyz dep tanýǵa jazǵan ótinishi qanaǵattandyrylsyn. Oǵan plastıkalyq hırýrgııa salasynda klınıkalyq is-tájirıbemen aınalysýǵa tyıym salynsyn», - dedi №2 Almaly aýdandyq sotynyń sýdıasy.
Sonymen qatar, departament mamandarynyń aıtýynsha, Pısarevtiń ruqsat sertıfıkatynyń merzimi ótken.
Ol «Apattar medıtsınasy temir jol gospıtalinde» sertıfıkatynyń bolmaǵanyna qaramastan 8 qańtarda klınıkalyq is-tájirıbe júrgizgen.
«Men «Apattar medıtsınasy temir jol gospıtalinde» 2018 jyly 12 jeltoqsanda bitetin sertıfıkatymen jumys jasadym. Osy merzimge deıin meniń jumysym zańdy boldy. Qujattyń ýaqyty bitken soń basshylyqqa aıttym da jumystan shettetildim. Agamýradovaǵa kelsek, onyń isi boıynsha sot úkimi áli kúshine engen joq. Sondyqtan, meni aıypty dep tanýǵa áli erte. Ekinshi is Іzbasarovanyń ólimi boıynsha tergeý júrip jatyr. Quqyqtyq baǵa beriletin bolady», - dedi Dmıtrıı Pısarev.
Alaıda, departament mamandarynyń aıtýynsha, ol jańa sertıfıkat alǵyzýǵa tyrysqan. Biraq, oǵan ruqsat berilmedi.
Esterińizge sala keteıik, Ýkraına azamatshasy Dana Agamuradova Almatyda ish maıyn alǵyzý úshin lıposaktsııa jasatpaq bolyp, jekemenshik emhanalardyń birinde ota jasatqan.
Otadan soń 6 saǵat ótkende Dana esin jımastan kóz jumǵan. Dárigerlerdiń aıtýynsha, patsıent maı túıirshikteriniń ókpe tamyrlaryn bitep qalýynan kóz jumǵan.
Otany jasaǵan plastıkalyq hırýrg Dmıtrıı Pısarevtiń qazir soty bolyp jatyr.
Dál osy hırýrgtyń qolynan byltyr qarashada taǵy bir áıel ómirden ozdy.
30 jastaǵy Laýra Іzbasarova plastıkalyq ota jasatyp, omyraýyn tarttyrmaq bolǵan.
Bul qylmystyq oqıǵany da polıtsııa tekserýge aldy.
Osy aptada 44 jastaǵy áıeldiń plastıkalyq otadan keıin qaıtys bolǵany belgili boldy. Áıelge otany «Moskva deLux» emhanasynyń hırýrgy Roman Alferov jasaǵan.
