Eki aıda ekonomıkaǵa qansha aqsha quıyldy
ASTANA. QazAqparat - Aǵymdaǵy jyldyń alǵashqy eki aıynda negizgi kapıtalǵa quıylǵan ınvestıtsııanyń kólemi 1,2 trıllıon teńgeni qurady. Bul ótken jylmen salystyrǵanda 54,4 protsentke, ıaǵnı 487,7 mıllıard teńgege artyq. Degenmen, ınvestıtsııany tartý jaǵynan baıaý jumys istep jatqan oblystar bar, dep xabarlaıdy QazAqparat tilshisi.
QR Investıtsııalar jáne damý vıtse-mınıstri Arystan Qabykenovtyń aıtýynsha, óndiriske salynǵan aqshanyń kólemi eki esege artyp, 851 mlrd teńgeni qurady. Sondaı-aq, taý-ken salasyna quıylǵan qarjy 313,5 mlrd teńgege ósip, 589 mlrd-qa jetti. Al óńdeý salasyna tartylǵan ınvestıtsııalar 221,4 mlrd teńgege teń boldy.
«2018 jyldyń qańtar-aqpan aılarynda syrtqy ınvestıtsııanyń kólemi 160,3 mlrd teńgege artyp, 361,5 mlrd teńgeni qurady. Investıtsııa kólemi artqan óńirlerge Atyraý men Qaraǵandy oblystaryn, sondaı-aq, Almaty qalasyn jatqyzýǵa bolady. Al Astana qalasy, Myńǵystaý men Shyǵys Qazaqstan oblystarynda ınvestıtsııanyń tómendegeni baıqalady», - dedi A.Qabykenov Úkimet úıinde ótken baspasóz máslıxatynda.
Onyń sózine qaraǵanda, QR Investıtsııalar jáne damý mınıstrligi «Kazakh Invest» ulttyq kompanııasymen birlese otyryp, 2018-2020 jyldarǵa arnalǵan 658 ınvestıtsııalyq jobanyń tizbesin jasap shyqty. Atalǵan jobalardyń jalpy somasy 59,2 mlrd AQSh dollaryn quraıdy. Sonyń ishinde sheteldikterdiń qatysýymen qolǵa alynatyn 140 joba (43,8 mlrd AQSh dollary) jáne otandyq ınvestorlardyń 518 jobasy (15,4 mlrd AQSh dollary) bar.
«Bıyl jalpy quny 6,5 mlrd dollar bolatyn 298 jobany iske qosý, sondaı-aq, jalpy quny 11 mlrd AQSh dollaryn quraıtyn 199 jobanyń qurylys-montajdaý jumystaryn bastaý josparlanyp otyr», - dep atap kórsetti A.Qabykenov.
Aıta keteıik, baspasóz máslıxatynda QR Energetıka vıtse-mınıstri Maǵzum Myrzaǵalıev Atyraý oblysyndaǵy polıetılen jáne polıpropılen zaýyttarynyń qurylysy jaıynda aıtyp berdi.
Budan bólek, vıtse-mınıstr Qashaǵan ken ornynda munaı óndirý kólemin azaıtýdyń sebebin túsindirdi.
Al tórtinshi munaı óńdeý zaýyty eki oblystyń bireýinde salynady.
