Eki aıda 1 ret ǵylym jetistikteri týraly daıdjest alyp turamyn – Prezıdent

ASTANA. QazAqparat – Pýrdý (AQSh) ýnıversıteti ıAdrolyq energetıka mektebiniń professory Zınetola Eńsepov Memleket basshysy Qasym-Jomart Toqaevqa otandyq ǵalymdardyń jetistikteri týraly aqparat alyp turýdy usyndy, dep habarlaıdy QazAqparat tilshisi.

«AQSh-ta el Prezıdenti janyndaǵy ǵylym jáne tehnologııa jónindegi keńestiń bir qyzmeti – ǵalymdar men Prezıdent ákimshiligi arasynda aqparat almastyrý. Sondyqtan bizdiń keńestiń ǵalymdary óz attarynan Memleket basshysyn jańalyqtar men tendentsııalar, ásirese ǵylym salasyndaǵy paıdaly usynystar jaıly aqparattandyryp otyrýdy usynady», - dedi ǵalym Memleket basshysynyń qatysýymen ótken Ǵylym jáne tehnologııalar jónindegi ulttyq keńestiń otyrysynda.

Osy oraıda Qasym-Jomart Toqaev ǵalymdar tarapynan aıtylǵan barlyq usynys jınaqtalyp, nazarǵa alynatyndyǵyn atap ótti.

«Men ózim búkil álemdegi ǵylymı jetistikter baıandalatyn daıdjesti eki aıda bir ret turaqty túrde alyp otyramyn. Otandyq ǵalymdarymyzdyń tarapynan da aqparat óte paıdaly bolar edi», - dep atap ótti Memleket basshysy.