Eki aıaǵynan aıyrylǵan Parafıevanyń isi: Avtobýs júrgizýshisi kinásin moıyndamady
ALMATY. QazAqparat - Almatyda eki aıaǵynan aıyrylǵan Ekaterına Parafıevanyń isi boıynsha sot jalǵasyp jatyr. Búgin sotta aıyptalýshy - avtobýs júrgizýshisi Dáýren Jańabaev, birneshe kýáger, «Almaty Tazalyq» ókili jáne sarapshy tyńdaldy, dep habarlaıdy QazAqparat tilshisi.
Avtobýs júrgizýshisine QR QK 345-babynyń 2-bóligi boıynsha (Abaısyzda adamnyń densaýlyǵyna aýyr zııan keltirýge ákep soqqan kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy) aıyp taǵyldy.
Aıyptalýshy Jańabaev óz kinəsin moıyndamady.
«Men Jarokov kóshesimen ál-Farabı kóshesine shyqtym. Kele jatyp, jolda synyp turǵan lıýkty, Honda kóligin, eki qyzdy kórgen soń ońǵa qaraı alyp, úshinshi jolaqqa shyǵa bastadym. Sol kezde sol jaqtan kenetten Camry shyqty. Tejegishti basyp úlgermedim. Soǵyldy. Men oń jaqqa shyǵyp úlgerdim, al Camry úlgergen joq. Art jaǵynan soqqan kezde mashına 180 gradýsqa aınalyp ketti», - dedi ol.
Dáýren Jańabaev sol kúni mektep oqýshylaryn tasymaldaǵan.
Avtobýs ıesi Abzal Turǵymbaıdyń aıtýynsha, ol Jańabaevpen kelisimshart jasaspaǵan. Júrgizýshi mektep dırektorymen de avtobýs ıesimen de arnaıy kelisimsiz jumys jasaǵan.
Al sarapshy Erjan Óteshov Parafıevanyń dóńgelegi synǵan lıýkty basyp ketken soń jarylǵanyn jetkizdi.
Sonymen qatar saraptama qorytyndysyna sáıkes, avtobýs jyldamdyǵy Camry jyldamdyǵynan góri joǵary bolǵandyǵy belgili boldy.
"Almaty Tazalyq" mekemesiniń ókili synǵan lıýktyń kesirinen bolǵan apattan soń qyzmettik tekserý júrgizilmegenin aıtty.
Eske sala keteıik, E. Parafıeva 16 maýsymda Almaty qalasyndaǵy ál-Farabı dańǵylynda bolǵan jol apatynan japa shekken bolatyn. Honda CRV kóligin tizgindegen qyzdar ashyq lıýkke kirip ketip, kólik dóńgelegin jaryp alǵan. Sodan jol shetine toqtap, syrtqa shyǵyp, kólikterin qarap jatqan kezde ortańǵy jolaqta kele jatqan Toyota Camry mashınasyn avtobýs soqqan. Qatty soqqydan Toyota Camry aınalyp, artqy jaǵymen Honda CRV kóligin urǵan. Saldarynan qyzdar ortada qysylyp qalyp, bireýi eki aıaǵynan aıyryldy.
Qazir Katıa belgili erikti, jattyqtyrýshy Kıra Ýdartsevanyń kómegimen ońaltý sharalarynan ótip jatyr. Endi ol arnaıy jattyǵýlardyń arqasynda protez kııýge daıyndalmaq. Kelinshek qaıyrymdylyq sharalaryna, qoǵamdyq jumystarǵa belsendi aralasýdy bastady. Ol múmkindigi shekteýli jandarǵa barynsha úmit syılap, kúresýge keńes berip keledi. Ekaterına qazir jattyǵý zalyna baryp júr.
