Eki aıaǵynan aıyrylǵan Parafıeva taǵy sotqa júgindi
ALMATY. QazAqparat - Jol apaty saldarynan eki aıaǵynan aıyrylǵan almatylyq Ekaterına Parafıeva taǵy da sotqa júgindi, dep habarlaıdy QazAqparat.
Bul joly Ekaterına Parafıeva moraldyq shyǵynyn ótep alý úshin apatqa kinálilerdi taǵy da sotqa berdi.
Jábirlenýshi Ekaterına Parafıevanyń aryzy azamattyq ister jónindegi Bostandyq aýdanynyń sotyna tústi.
«Biz Toyota Camry kóligi men avtobýs ıelerinen 10 mıllıon teńge óndirip almaqpyz. Aryz sotqa jiberildi», - deıdi Ekaterına Parafıevany jaqtaýshy, quqyq qorǵaýshy Janna Muhamadı.
Buǵan deıin bolǵan sot jol apatyna kináli avtobýs júrgizýshisi Daýren Jańabaevty 2 jyl bas bostandyǵynan aıyryp, 2 mln teńge tóleýge mindettegen edi.
Eske sala keteıik, E. Parafıeva 16 maýsymda Almaty qalasyndaǵy ál-Farabı dańǵylynda bolǵan jol apatynan japa shekken bolatyn.
Honda CRV kóligin tizgindegen qyzdar ashyq lıýkke kirip ketip, kólik dóńgelegin jaryp alǵan. Sodan jol shetine toqtap, syrtqa shyǵyp, kólikterin qarap jatqan kezde ortańǵy jolaqta kele jatqan Toyota Camry mashınasyn avtobýs soqqan. Qatty soqqydan Toyota Camry aınalyp, artqy jaǵymen Honda CRV kóligin urǵan. Saldarynan qyzdar ortada qysylyp qalyp, bireýi eki aıaǵynan aıyryldy.
Avtory: Joldas Órisbaev
