Eki aıaǵynan aıyrylǵan Ekaterına Parafıeva ekstremaldy sportqa bet burdy
ALMATY. QazAqparat - Jol apaty saldarynan eki aıaǵynan aıyrylǵan almatylyq Ekaterına Parafıeva ekstremaldy sportpen aınalysyp júr, dep habarlaıdy QazAqparat tilshisi.
Kelinshek jaqynda Qaskeleńde ótken baggı týrǵa qatysqan. Ol Feısbýktegi paraqshasynda Baggıdrom jetekshisine alǵysyn jetkizdi.
«Eldar men onyń komandasyna osyndaı keremet kóńil-kúı men adrenalın syılaǵany úshin alǵys bildiremin. Bári kóńilimnen shyqty», - dep jazdy E.Parafıeva.
Aıta keteıik, Almatydaǵy Baggıdromda arnaıy baggılermen jáne jol talǵamaıtyn kóliktermen jolsyz, taýly-tasty jerlerdi baǵyndyryp kórýge bolady.
Qazir kelinshek belgili volonter, jattyqtyrýshy Kıra Ýdartsevanyń kómegimen ońaltý sharalarynan ótip jatyr. Endi ol arnaıy jattyǵýlardyń arqasynda protez kııýge daıyndalmaq. Osydan birneshe apta buryn Ekaterına aıaǵyna ınfektsııa túsip aýrýhanaǵa jatyp shyqqan bolatyn.
Kıra Ýdartsevanyń aıtýynsha, aıaqtary ampýtatsııalanǵan adamǵa jattyqtyrýdy toqtatpaǵan mańyzdy. Bulshyq etter ydyrap ketpes úshin olardy qataıtý kerek. Áıtpese protez kııý qıynǵa soǵady.
Aıta keteıik, Katerına buǵan deıin bylǵary qolǵap kıip, boksqa beıimdele bastaǵany habarlanǵan edi.
Eske salaıyq, kelinshek 16 maýsymda Almaty qalasyndaǵy Ál-Farabı dańǵylynda bolǵan jol apatynan japa shekken edi. Honda CRV tizgindegen qyzdar ashyq lıýkke kirip ketip, kólik dóńgelegin jaryp alǵan. Olar jol shetine toqtap, kólikterin qarap jatqan kezde, Honda CRV-nyń artynda kele jatqan Toyota Camry onymen soqtyǵysýdan qashyp, birden ortańǵy jolaqqa aýysa bastaıdy. Manevr jasaý kezinde avtobýspen túıisip, Toyota Camry soqqymen Honda CRV-ny artynan urady. Saldarynan qyzdar ortada qysylyp qalyp, bireýi eki aıaǵynan aıyrylǵan bolatyn . Al ekinshi qyz №7 qalalyq aýrýhananyń nevrologııa bólimine jatqyzyld y.
