Eki aıaǵynan aırylǵan kelinshek kelesi jyly Cha-Cha-Cha bıleýge ýáde berdi
ALMATY. QazAqparat - Eki aıaǵynan aırylǵan almatylyq kelinshek Ekaterına Parafıeva kelesi jyly protez kıip, cha-cha-cha bıleýge ýáde berdi, dep habarlaıdy QazAqparat tilshisi.
Kelinshek qaıyrymdylyq sharalaryna, qoǵamdyq jumystarǵa belsendi aralasýdy bastady. Ol múmkindigi shekteýli jandarǵa barynsha úmit syılap, kúresýge keńes berip keledi.
Ekaterına qazir jattyǵý zalyna baryp júr.
Telejúrgizýshi, akter kaskader Erden Telemısov óziniń Feısbýktegi paraqshasynda Ekaterınamen birigip jattyǵýǵa qatysqanyn jazdy.
«Bul qyzdyń erik-jigerine tań qaldym. Buryn da estıtinmin, kúresker ekenin. Qazir jaqyn tanysa kele oǵan ábden kózim jetti. Oǵan ómir kóp synaq berdi. Birneshe aı buryn jol apatynan aıaǵynan aıryldy. Biraq ol moıymady. Katıa - kúresker! kelesi jyly jazda biz Cha-Cha-Cha bıleımiz dep ýaǵdalastyq», - dedi Erden Telemısov.
Aıta ketý kerek, shoýmen «Erdesha-Pohýdesha. Mınýs 20 kg za 10 nedel» blogyn júrgizip keledi.
Ekaterına Parafıevanyń jattyqtyrýshysy Kıra Ýdartsevanyń aıtýynsha, qazannyń aıaǵynda kelinshektiń aıaǵyna taǵy kúrdeli ota jasalady.
«Alda qıyn sátter, qaıta qalpyna kelý kezeńi tur. Ońaı bolmaıdy. Biraq bárin jeńýge bolady», - dedi K.Ýdartseva.
Qazir Katıa belgili erikti, jattyqtyrýshy Kıra Ýdartsevanyń kómegimen ońaltý sharalarynan ótip jatyr. Endi ol arnaıy jattyǵýlardyń arqasynda protez kııýge daıyndalmaq.
Eske sala keteıik, kelinshek 16 maýsymda Almaty qalasyndaǵy ál-Farabı dańǵylynda bolǵan jol apatynan japa shekken bolatyn. Honda CRV kóligin tizgindegen qyzdar ashyq lıýkke kirip ketip, kólik dóńgelegin jaryp alǵan. Sodan jol shetine toqtap, syrtqa shyǵyp, kólikterin qarap jatqan kezde ortańǵy jolaqta kele jatqan Toyota Camry mashınasyn avtobýs soqqan. Qatty soqqydan Toyota Camry kóliginiń artqy bóligi ushyp kelip Honda CRV kóligine tıgen. Saldarynan qyzdar ortada qysylyp qalyp, bireýi eki aıaǵynan aıyrylǵan bolatyn.
