Eki aıaǵynan aırylǵan almatylyq kelinshektiń úıdegi alǵashqy aptasy qalaı ótti
ALMATY. QazAqparat - Jol apaty kesirinen eki aıaǵynan aırylǵan almatylyq kelinshektiń jattyqtyrýshylary alǵashqy aptanyń qalaı ótkenin aıtty, dep habarlaıdy QazAqparat tilshisi.
Óziniń oıymen onyń jattyqtyrýshysy Kıra Ýdartseva Feısbýktegi paraqshasynda bólisti.
«Alǵashqy apta ońaı bolmady. Katıa sál aýyryp qaldy. Vırýs. Sonymen qatar aıaǵyndaǵy jara da tolyq jazylmaı jatyr. Qaıtadan aýrýhanaǵa baryp, dákeni aýystyryp jatyrmyz. Katıa - óte aqyldy, myqty qyz. Sizderdiń qoldaýlaryńyz oǵan kúsh beredi», - dedi Kıra Ýdartseva.
Erikti sondaı-aq, jazbasynda ortoped Vladımır Babıakın týraly aıtyp ótti.
«Babıakın Vladımır, seniń atqaryp jumystaryńa tań qalamyn!!! (...) Kúshti bolsa da Katıany názik hrýstaldi kótergendeı muqııat kóteredi. Volodıa, kóp rahmet», - dedi Kıra Ýdartseva.
Qazir Katıa belgili erikti, jattyqtyrýshy Kıra Ýdartsevanyń kómegimen ońaltý sharalarynan ótip jatyr. Arnaıy jattyǵýlardyń kómegimen ol protez kııýge daıyndalmaq.
Eske sala keteıik, jol apaty 16 maýsymda Almaty qalasyndaǵy Ál-Farabı dańǵylynda bolǵan. Honda CRV kóligin tizgindegen qyzdar ashyq lıýkke kirip ketip, kólik dóńgelegin jaryp alǵan. Sodan jol shetine toqtap, syrtqa shyǵyp, kólikterin qarap jatqan kezde ortańǵy jolaqta kele jatqan Toyota Camry kóligin avtobýs soqqan. Soqqydan Toyota Camry kóliginiń artqy bóligi ushyp kelip Honda CRV kóligin soǵady. Saldarynan qyzdar ortada qysylyp qalyp, bireýi eki aıaǵynan aıyrylǵan bolatyn.
