Eki aıaǵyn kólik julyp ketken kelinshektiń jaǵdaıy áli aýyr - dárigerler
ALMATY. QazAqparat - Almatyda eki aıaǵyn kólik julyp ketken kelinshektiń jaǵdaıy týraly dárigerler aıtyp berdi, dep habarlaıdy QazAqparat.
Qalalyq Densaýlyq saqtaý basqarmasynyń baspasóz qyzmeti taratqan aqparatqa sáıkes, qazirgi tańda 32 jastaǵy Ekaterına Parafıeva áli de aýyr halde jatyr.
«Patsıent Ortalyq klınıkalyq aýrýhanada jatyr. Oǵan keshe ota jasaldy. Jaǵdaıy dınamıkalyq turǵyda jaqsy. Biraq, áli de aýyr halde jatyr. Jınalǵan konsılıým dárigerleri kelinshektiń 2 aıaǵyn da tilersektiń joǵarǵy tusynan kesip tastaýdy uıǵardy. Ol áli de qarqyndy terapııa boıynsha em alyp jatyr», - dedi baspasóz qyzmetinen.
Mekemeniń baspasóz qyzmeti málimdegendeı, qazirgi tańda naýqasty emdeýge eldegi eń myqty mamandar shaqyryldy. Oǵan tegin medıtsınalyq kómektiń kepildendirilgen kólemi boıynsha em jasalýda. Qajetti dári-dármekpen de qamtylyp jatyr.
«Sondyqtan, qandaı da bolmasyn aqsha jınaýdyń qajettigi joq», - dedi baspasóz qyzmetinen.
Aıta ketý kerek, jol apaty Ál-Farabı dańǵylynda bolǵan. Honda CRV kóligin tizgindegen qyzdar ashyq lıýkke kirip ketip, kólik dóńgelegin jaryp alǵan. Sodan jol shetine toqtap, syrtqa shyǵyp kólikterin qarap jatqan kezde ortańǵy jolaqta kele jatqan Toyota Camry kóligin avtobýs soqqan. Soqqydan Toyota Camry kóliginiń artqy bóligi ushyp kelip Honda CRV kóligin soǵady. Saldarynan qyzdar ortada qysylyp qalǵan.
Qalalyq ІІD baspasóz qyzmeti habarlaǵandaı, atalǵan derek QR QK 345-babynyń 2-bólimi boıynsha sotqa deıingi tergeý isi reestrine tirkeldi.
Qaıǵyly oqıǵaǵa baılanysty jelide japa shekken qyzdyń týǵandary arnaıy shot ashyp, aqshalaı kómek suraı bastaǵan. Medıtsınalyq mekemelerdiń habarlaǵanyndaı, buǵan esh qajettilik joq.
