Eki aptada 7 146 elordalyq JRVI juqtyrǵan

ASTANA. QazAqparat – Eki apta ishinde 7 146 elordalyq jiti respıratorlyq vırýstyq ınfektsııa juqtyrǵan. Bul týraly bas shahar ákimdiginiń baspasóz alańynda baıandama jasaǵan Astana qalasynyń bas memlekettik sanıtarııalyq dárigeri Sarhat Beısenova málim etti, dep habarlaıdy QazAqparat tilshisi.

«2022 jyldyń 29 qyrkúıekten 12 qazanǵa deıingi aralyǵynda elorda turǵyndary arasynda jiti respıratorlyq vırýstyq ınfektsııalardyń 7 146 jaǵdaıy tirkeldi. Ótken jyldyń uqsas kezeńinde 8 416 jaǵdaı tirkelgen edi. 100 myń turǵynǵa shaqqandaǵy qarqyndy kórsetkishterdi salystyrý kezeńinde osy maýsymnyń syrqattaný kórsetkishi 19 paıyzǵa tómen ekeni anyqtaldy», - dedi Sarhat Beısenova.

Onyń aıtýynsha, Astana qalasynda jyl boıy tumaýǵa uqsas vırýspen aýyrǵandardan taldaýlar alyp, olarǵa genetıkalyq zertteý júrgizetin 8 medıtsınalyq uıym bar.

«Mundaı jumystar qaladaǵy epıdemıologııalyq jaǵdaıdy baqylap otyrýǵa múmkindik beredi. Osylaısha, aǵymdaǵy epıdemıologııalyq maýsymda jiti respıratorlyq vırýstyq ınfektsııa juqtyrǵan 14 adamnan B tumaýy anyqtaldy. Tekserý nátıjesinde patsıentterden COVID-19 vırýsy anyqtalǵan joq», - dep atap ótti Astana qalasynyń bas memlekettik sanıtarııalyq dárigeri.

Sarhat Beısenovanyń málimdeýinshe, bıylǵy epıdemıologııalyq maýsymda 247 júkti áıel, 14 jasqa deıingi 4 140 bala jáne 1 jasqa deıingi 66 náreste JRVI juqtyrǵan.