Eki aptada 3 myńǵa jýyq brakonerlik faktisi anyqtaldy – ІІM
«Polıtseıler óz quzyreti aıasynda tabıǵatty qorǵaý is-sharalaryna qatysyp, qorshaǵan ortany qorǵaý salasyndaǵy ýákiletti organǵa kómek kórsetedi. Tabıǵat qorǵaý polıtsııasynyń ınspektorlary qorshaǵan ortany qorǵaý jónindegi ýákiletti organnyń qyzmetkerlerimen birlesip, janýarlar dúnıesi, balyq resýrstary, orman sharýashylyǵy jáne jer qoınaýyn paıdalaný salasyndaǵy ekologııalyq zańnamanyń oryndalýyn jáne zańsyzdyqtyń jolyn kesýge baǵyttalǵan reıdtik is-sharalardy udaıy júrgizip turady», - dedi Álisher Jarmaǵambetov vedomstvoda ótken baspasóz máslıhatynda.
ІІM ókili keltirgen málimetke sáıkes, ótken jyly brakonerlik faktileri boıynsha 137 qylmystyq quqyq buzýshylyq jáne 5 myńǵa jýyq ákimshilik quqyq buzýshylyq anyqtaldy.
«Bıyl 24 aqpannan bastap 13 naýryz aralyǵynda Іshki ister mınıstrligi «Brakoner» profılaktıkalyq sharasyn ótkizdi. Onyń qorytyndysy boıynsha tabıǵat qorǵaý zańnamasyn buzýdyń 3 myńǵa jýyq faktisi anyqtaldy. Onyń ishinde janýarlar dúnıesi salasynda 2 myńǵa jýyq, orman sharýashylyǵy salasynda 60, balyq resýrstary salasynda 500-ge jýyq jáne ózge de zańbuzýshylyqtar bar», - deıdi ol.
Onyń aıtýynsha, búginde balyqtar men basqa da sý janýarlarynyń ýyldyryq shashý kezeńi bastaldy.
Bıoalýantúrlilikti saqtaý maqsatynda Ekologııa jáne tabıǵı resýrstar mınıstrligi el aýmaǵynda balyq aýlaýǵa tyıym saldy.
«Shekteý merzimi týraly tolyǵyraq Ekologııa jáne tabıǵı resýrstar mınıstrliginiń saıtynan bile alasyzdar. Atalǵan talapty buzǵany úshin zańnamada 10-nan 40 AEK-ke deıingi mólsherde aıyppul túrinde ákimshilik jaýapkershilik jáne 3 jylǵa deıin bas bostandyǵynan aıyrý túrinde qylmystyq jaýapkershiligi kózdelgen», - deıdi tabıǵatty qorǵaý polıtsııasynyń qyzmetkeri.
