Eki apta saıyn álemde bir halyqtyń tili joıylady - BUU
ASTANA. QazAqparat - 9 mamyrda Nıý-Iorkte baıyrǵy halyqtar máselesine arnalǵan turaqty forýmnyń 15-shi sessııasy ótti. Onda osy ulttardyń máseleleri jáne tili jaıy talqylandy.
Baıyrǵy halyqtardyń tilderiniń joıylýy jalǵasyp keledi. Qoldaǵy derekterge sensek, ár eki aptada bir baıyrǵy halyqtyń tili joıylady.
Forýmda jarııa etilgen baıandamalardyń birinde, qazir álemde 6 700 til bar ekendigi aıtylǵan. Onyń 96 paıyzyn álem turǵyndarynyń úsh paıyzy ǵana qoldanady. Joıylý qaýpi tóngen tilderdiń deni baıyrǵy halyqtarǵa tıesili.
Zertteý avtorlary osy ǵasyrdyń aıaǵynda baıyrǵy halyqtardyń kópshiliginiń tilderi joıylyp ketýi múmkin dep qaýiptenedi. Sarapshylar osy máseleni sheshýdi usynady. Óıtkeni baıyrǵy halyqtardyń tili baılanys quraly ǵana emes, myńdaǵan jyldar boıy qalyptasqan keshendi bilim júıesi. Ol baıyrǵy halyqtardyń bolmysynda, dúnıetanymynda basty rolge ıe.
«Baıyrǵy halyqtardyń tiliniń joıylýy olardyń ózderiniń quryp ketýine alyp keledi», - delingen zertteýde. Sarapshylardyń oıynsha, baıyrǵy halyqtardyń joıylýy jáne olardyń mádenıetiniń quryp bara jatýy otarlaý saldarynan boldy. Sondaı-aq máseleni jahandaný men basym túsken mádenıet pen tilder ýshyqtyra túsken.
