Eki adamnyń ómirin qıǵan kólik júrgizýshisi eki saǵattan soń quryqtaldy - Almaty ІІD

Jol kólik oqıǵasy Almaty qalasyndaǵy soltústik aınalma jolynda túngi saǵat ekiler shamasynda oryn alǵan. Osy aýdannyń 20 jáne 22 jastaǵy eki turǵyny jaıaý júrginshiler jolaǵy belgilengen jerden kósheniń arǵy betine ótip bara jatqan, osy mezette asa úlken jyldamdyqpen júıtkip kele jatqan «Aýdı» markili avtokóligi olardy qaǵyp ketken.

«Temir tulpar tizginin ustaǵan bul azamat jaıaý júrginshilerge alǵashqy medıtsınalyq kómek kórsetýdiń ornyna oqıǵa ornynan qashyp ketken. Bálkim tez arada kómek kórsetilgende marqum bolǵandardyń ómirin saqtap qalýǵa múmkindik bolar ma edi? Alaıda jaıaý júrginshiler jol ústinde qansyrap jatyp qalǵan. Muny osy mańnan ótip bara jatqan basqa júrgizýshiler baıqap qalǵan. Ókinishke qaraı, bul mezette olar oqıǵa ornynda jan tásilim etken edi. Keıinirek úılerine qaıtyp kele jatqan eki jas jigit Almatynyń turǵylyqty turǵyndary ekendikteri anyqtaldy»,-dedi Almaty qalasy ІІD Jol polıtsııa basqarmasy bastyǵy polıtsııa polkovnıgi Arman Sarbasov.

Al, bul ýaqyt ishinde jol polıtsııasynyń izdestirý bóliminiń tájirıbeli qyzmetkerlerinen jedel izdestirý toby qurylǵan. Olar oqıǵa ornynda jatqan búlingen kóliktiń bólshekterin jınap, saraptamaǵa jóneltken, sonyń nátıjesinde, nebári eki saǵat ishinde atalmysh kóliktiń markasy men túsi anyqtalǵan. Odan keıin, qalamyzda tirkelgen osy ispettes kólikterdi tez arada tekserý jumystary júrgizile bastaıdy.

«Tańǵy saǵat bester shamasynda bizdiń qyzmetkerler «Altyn besik» yqsham aýdanynyń bir turǵynynyń jeke basyn jáne onyń tirkelgen kóligin tekserýge keledi. Onyń aýlasynda aldyńǵy bóligi búlingen, qan izderi bar temir tulpar qańtarylyp turady. Eshkimniń nazaryn aýdarmas úshin ol kóligin qymtap jaýyp qoıǵan. Jazyqsyz eki adamnyń ómirin qıǵan ol alańsyz uıqy qushaǵynda jatqan. Bul degenimiz kólik ıesiniń jaýapkershiliginiń, azamattyq ar-uıatynyń múldem tómen ekendigin kórsetedi. Al, «Aýdı» avtokóligi zańdy túrde tárkilenip, onyń 23-jasar júrgizýshisi temir torǵa toǵytyldy»-dep basa aıtty A.Sarbasov.

Al óz kezeginde jol saqshylary qandaıda bir jol kólik oqıǵasy ornynan qashyp ketken kez-kelgen júrgizýshige taǵylatyn aıyp, basqa jazalarǵa qaraǵanda qatań ekendigin eskertip, azamattardy jol júrý erejelerin qatań saqtap, jol ústinde abaı bolýǵa shaqyrdy.