Eki adamnyń ólimine sebepshi bolǵan áıel 5 jylǵa sottaldy
Jol apaty 2019 jyly 15 qyrkúıekte Almaty qalasynyń Bostandyq aýdanynda bolǵan. «Toyota Land Cruiser Prado» kóligin júrgizgen áıel «jol berińiz» degen belgini elemeı, burylystan ótken. Al oǵan qarsy baǵytta kele jatqan «Lexus GX-300» avtokóligi der kezinde toqtaı almaı, soqtyǵysqan. Qóliktiń biri sol ekpinimen Rozybakıev kóshesiniń boıynda turǵan tórt jaıaý júrginshini qaqqan.
«Sot tergeýinde belgili bolǵandaı, jaıaý júrginshiniń biri – 1992 jyly týǵan K. esimdi azamat jaraqattan oqıǵa ornynda qaıtys boldy. Ekinshisi – 1994 jyly týǵan A. esimdi azamat aýrýhanada kóz jumady. Basqa zardap shekkender medıtsınalyq mekemelerdiń birinde uzaq ýaqyt em alǵan», - deıdi Almaty qalalyq Polıtsııa departamenti bastyǵynyń orynbasary Rústem Ábdrahmanov.
Sotqa deıingi tergeý Qylmystyq kodekstiń 345-baby 4-bóligine sáıkes qylmystyq quqyq buzýshylyq belgileri boıynsha júrgizildi. Tergeý men saraptamalyq zertteýler kúdikti S.Tanıkeevanyń kinásin dáleldedi.
Almaty qalasynyń Bostandyq aýdandyq soty ony eki adamnyń ólimine ákep soqqan jol-kólik oqıǵasyna kináli dep tanydy. Ol bes jylǵa bas bostandyǵynan aıyryldy.