Eki adamnyń ólimine sebepker bolǵan júrgizýshi alty jylǵa sottaldy - BQO
ORAL. QazAqparat - Terekti aýdandyq №2 sotynyń úkimimen Sh. degen azamat QR QK 200-baby 3-bóligi, 345-baby 4-bóligimen aıypty dep tanylyp, alty jyl bas bostandyǵynan aıyryldy.
Sot tóraǵasy Ibragım Nııazǵalıevtiń aıtýynsha, sonymen birge ol kólik quralyn basqarý quqyǵynan bes jylǵa aıyryldy.
Atalǵan turǵyn E. degen azamatpen aldyn ala sóz baılasyp, ortaq tanystarynyń avtokóligin urlaý maqsatynsyz aıdap ketip, iri mólsherde zalal keltirgen. Onymen qoımaı, sol kúni Sh. mas kúıinde álgi avtokólikpen Shymkent-Samara joly boıynda Terekti aýdany Barbastaý aýyly tusynda qarsy betke shyǵyp ketip, basqa bir kólikpen soqtyǵysýǵa jol bergen. Sonyń saldarynan ózi aıdaǵan avtokóliktegi jolaýshy men qarsy kele jatqan avtokóliktiń júrgizýshisi oqıǵa ornynda kóz jumǵan.
Sot úkimi zańdy kúshine engen joq.
