Eki adamdy pyshaqtap óltirdi: sot aqmolalyqty ómir boıyna bas bostandyǵynan aıyrdy

Aqmola oblysynda bir ret kisi óltirgen úshin 9 jyl sottalyp shyqqan qylmysker taǵy eki adamnyń ómirin qıdy. Sot ony bul joly ómir boıyna bas bostandyǵynan aıyrdy, dep habarlaıdy QazAqparat tilshisi oblystyq sottyń baspasóz qyzmetine silteme jasap.

Vedomstvonyń málimetinshe, Aqmola oblysynyń qylmystyq ister jónindegi mamandandyrylǵan aýdanaralyq sotynda belgili bolǵandaı, úsh adam (eki erkek, bir áıel) qosylyp, alkogoldi ishimdik ishken. Keıin aralarynda janjal týyndap, er adamnyń biri ekinshisine birneshe jerden pyshaq suǵyp alady. Japa shekken adam sol jerde jan tásilim etedi. Artynsha, kináli qylmysyn jasyrý úshin birge bolǵan áıeldi de pyshaqtap óltiredi.

Sóıtip, er adam jasaǵan qylmysyn jasyrý maqsatynda, birden eki adamdy óltirip, asa aýyr qylmys jasaıdy (Qylmystyq kodeksiniń 99-baby 2-bóliginiń 10 jáne 13 bólikteri).

Sottalǵan adamnyń kinási jábirlenýshiler men kýágerlerdiń aıǵaqtary, bolǵan oqıǵa ornyn tekserý hattamalary, júrgizilgen saraptama qorytyndylary, sottalǵannyń kinásin tolyq moıyndap kelýi, kórsetken aıǵaqtarynyń naqtylanýyn tekserý hattamasymen jáne is boıynsha basqa da dáleldemelermen rastalady. Jazany taǵaıyndaý kezinde sot er adamnyń buryn 2008 jyly kisi óltirgeni úshin sottalyp, 9 jylǵa bas bostandyǵynan aıyrý jazasyn tolyq ótegenin eskerdi. Sonymen birge, sot onyń áreketterinde qylmystardyń qaýipti qaıtalanýyn anyqtady.

«Sot úkimimen aıyptalýshy eki adamdy óltirgeni úshin ómir boıyna bas bostandyǵynan aıyryldy. Jábirlenýshilerdiń týystaryna moraldyq zııan men materıaldyq zalaldy óteý týraly talap aryzdar qanaǵattandyryldy. Úkim zańdy kúshine engen joq», - dedi vedomstvodan.

Aıta ketsek, budan buryn anasyn aıaýsyz tepkilegen aqmolalyq 4 jylǵa sottalǵanyn jazǵan edik.