Eki adamdy órtten qutqaryp qalǵan semeılik marapattaldy
SEMEI. QazAqparat – Semeı qalasynda eki adamdy órtten qutqaryp qalǵan Dáýren Jambaev marapattaldy, dep habarlaıdy QazAqparat tilshisi.
29 mamyrda Semeıdegi Dostoevskıı kóshesinde ornalasqan dámhananyń as bólmesinen órt shyqqan. Órtti birinshi bolyp jaqyn jerde turatyn Dáýren Janbaev baıqady. Kómekke umtylǵan ol 1995 jáne 1985 jyly týǵan dámhananyń eki qyzmetkerin qutqaryp qaldy.
«Qaladaǵy Nazarbaev zııatkerlik mektebi dırektorynyń orynbasary Dáýren Jambaev fýtboldan Chempıondar lıgasynyń fınaldyq oıynan tamashalap bolǵan kezde terezeden dámhanadaǵy tútindi kórgen. Órt sóndirýshilerge dereý habar bergen soń sol jaqqa qaraı júgirip baryp, tereze men esikti qaqqan. Óz densaýlyǵyna qaýip tónetindigin oılamaı kómekke umtylyp, eki adamdy qutqardy. Keıinirek kelgen órt sóndirýshiler dámhanadan tórt gaz ballonyn alyp shyqqan», - deıdi qala ákimi Baqytjan Baıahmetov.
Onyń aıtýynsha, semeılik naǵyz erliktiń úlgisin kórsetti. Ákim beıbit kúnniń batyryna Qurmet gramotasyn jáne tońazytqysh satyp alýǵa sertıfıkat tabystady.
Esterińizge sala ketsek, osyǵan deıin Semeı turǵynynyń 2 adamdy órtten qutqaryp qalǵanyn habarlaǵan edik.
