Eki adamdy órtten qutqarǵan semeılik oqıǵanyń qalaı bolǵanyn aıtyp berdi
SEMEI. QazAqparat – Semeı qalasynda eki adamnyń janyn ajaldan arashalap qalǵan Dáýren Jambaev oqıǵanyń qalaı bolǵanyn aıtyp berdi, dep habarlaıdy QazAqparat tilshisi.
Osyǵan deıin Semeı turǵynynyń 2 adamdy órtten qutqaryp qalǵanyn habarlaǵan edik. Qaladaǵy fızıka-matematıka baǵytyndaǵy Nazarbaev Zııatkerlik mektebi dırektorynyń qarjy-sharýashylyq isi jónindegi orynbasary bolyp jumys isteıtin beıbit kúnniń batyry sol bir syn saǵatty esine aldy. Oqıǵa jeksenbi kúni tańǵy saǵat 4 pen 5-tiń arasynda bolǵan.
«Senbi kúni tún ortasynan aýa kópshilik kútken fýtboldan Chempıondar lıgasynyń fınaldyq oıyny ótti. Sol match aıaqtalysymen dalaǵa shyqqanmyn. Úıime jaqyn jerde dámhananyń órtenip jatqanyn baıqap, lezde órt sóndirýshilerge habarladym. Ózim de birden sol jaqqa qaraı júgirdim. Kele sala barlyq esik, terezelerdi qaqtym. Alǵashynda tyrp etken jan baıqalmaǵanymen, ǵımarattyń apattyq esigin sońǵy kúshin salyp árez ashqan bir azamatty kórdim. Esikti asha sala kók tútinniń kesirinen esinen tana berdi. Ony baspaldaq arqyly tómenge alyp túsip, alǵashqy kómek kórsettim. Esin jıysymen ishte taǵy bir adamnyń qalǵanyn aıtty. Endi ishke birden kirý múmkin emes bolyp ketipti. Jalyn kúsheıip, órttiń aýmaǵy keńeıip barady. Іshke kirgenimmen, ózim tunshyǵa bastadym. Qaıta dalaǵa shyǵyp, dámhanany aınala júgirdim. Áıteýir terezeni kirpishpen syndyryp, ekinshi adamdy alyp shyqtym», - deıdi Dáýren Jambaev.
Óz sózinde ol naǵyz erlikti órt sóndirýshilerdiń atqarǵanyn atap ótti. Qutqarýshylar qyzyl jalynǵa qaramastan, dámhana ishinen 4 gaz ballonyn alyp shyqqan.
Aıta keteıik, eki adamdy órtten qutqarǵan semeılik 5 bala tárbıelep otyr.
