EQDB Túrkııada áıelder men jastardyń jumyspen qamtylýyn qoldaýǵa €75 mln bóledi

ASTANA. KAZINFORM – Bank jańa jumyspen qamtýǵa yntalandyrý baǵdarlamasy aıasynda Túrkııanyń Ónerkásiptik damý bankine (TSKB) 75 mıllıon eýro (shamamen 86 mıllıon AQSh dollary) kóleminde qarjy beredi, dep jazdy Kazinform agenttiginiń menshikti tilshisi.

Eýropa qaıta qurý jáne damý banki (EQDB) Túrkııada turaqty ári ınklıýzıvti damýdy qoldaýdy jalǵastyryp keledi. 

EQDB-nyń resmı málimdemesinde kórsetilgendeı, bul qarjy áıelder men jastarǵa arnalǵan jumys oryndaryn ashatyn kásiporyndardy, sondaı-aq 2023 jylǵy joıqyn jer silkininen keıin qalpyna kelip jatqan kompanııalardy qoldaýǵa baǵyttalady.

Kimder qoldaý alady?

Qarjylandyrý ınklıýzıvtilik pen aımaqtyq qalpyna kelýge basymdyq bere otyryp bólinedi:

• Qarajattyń 15%-y jastardy jumyspen qamtýdy belsendi túrde qoldaıtyn kompanııalarǵa beriledi – bul jastardy oqytý, tájirıbeden ótkizý jáne jumysqa ornalastyrýdy qamtıdy.

• Taǵy 15%-y jer silkinisinen zardap shekken aımaqtarda, ásirese Túrkııanyń ońtústigi men ońtústik-shyǵysyndaǵy kásiporyndarǵa baǵyttalady.

• Qalǵan 70%-y áıelderdiń jumysqa ornalasýyna, kásibı damýyna jáne basqarýshy laýazymdarǵa jetýine qoldaý kórsetetin ınklıýzıvti kadrlyq saıasaty bar kompanııalarǵa beriledi.

Túrkııa joıqyn jer silkinisiniń saldarynan myńdaǵan adamnyń ómirin qıǵan jáne el ekonomıkasyna eleýli zııan keltirgen aýyr kezeńnen keıin qalpyna keltirýdi jalǵastyryp jatyr. Qazirgi tańda basty mindetterdiń biri – jumys oryndaryn qalpyna keltirý jáne daǵdarys jaǵdaıynda eń kóp zardap shekken áleýmettik osal toptarǵa, sonyń ishinde áıelder men jastarǵa qoldaý kórsetý.

— Bul bastama ınvestıtsııanyń tek ekonomıkalyq emes, sonymen qatar áleýmettik mańyzy bar ekenin kórsetedi, — dep atap ótti EQDB ókilderi.

EQDB sońǵy birneshe jylda Túrkııadaǵy jeke sektordy damytý, «jasyl» jobalardy qarjylandyrý jáne ınfraqurylymdy jańartý salalarynda negizgi syrtqy seriktesterdiń biri bolyp keledi. Sońǵy bes jylda bank Túrkııa ekonomıkasyna $8 mıllıardtan astam ınvestıtsııa salyp, iri de, shaǵyn kásiporyndarǵa qoldaý kórsetti.

Buǵan deıin Túrkııa 1915 jylǵy Chanakkale kópirin jańǵyrtý úshin $280 mıllıon kóleminde nesıe alatyny týraly habarlanǵan bolatyn.