EQDB «Saryarqa» gaz qubyry qurylysyn qarjylandyrmaq

ASTANA. QazAqparat - Eýropalyq qaıta qurý jáne damý banki «Saryarqa» magıstraldy gaz qubyrynyń qurylysyn qarjylandyrýǵa daıyn. Bul týraly búgin Úkimet otyrysynan keıin QR Energetıka mınıstri Qanat Bozymbaev málim etti, dep habarlaıdy QazAqparat tilshisi. 

«Keshe Eýropalyq qaıta qurý jáne damý banki vıtse-prezıdentimen kelissóz júrgizdik. Olar gaz qubyrynyń magıstraldik bóligin de, taratý jelisin de qarjylandyrýǵa daıyn. Jumys tobyn quryp, olarmen Jol kartasyn jasaımyz dep ýaǵdalastyq. Taratý jelisine jaýap beretin ákimdikterdiń qatysýmen keńes ótkizemin. Menińshe, kelesi aptada jumys jáne qarjylandyrý kólemi anyqtalady», - dedi Qanat Bozymbaev.

Buǵan deıin habarlaǵanymyzdaı, «Saryarqa» magıstraldy gaz qubyrynyń «Qyzylorda-Jezqazǵan-Qaraǵandy-Temirtaý-Astana» baǵyty boıynsha birinshi kezeńi 2019 jyldyń jeltoqsan aıyna deıin aıaqtalady. Birinshi kezeńniń boljamdy quny 267 mlrd teńgeden asady. Qaraǵandy, Aqmola oblystary men Astana qalasynyń ákimdikteri magıstraldy gaz qubyry men aımaqtyq jeliler qurylysynyń merzimin eskere otyryp, ınfraqurylym qurylysy úshin jol kartasyn ázirlegen.

Birinshi kezeńde gaz qubyry 171 eldi mekenge tartylady, 2,7 mıllıon adam gazben qamtamasyz etiledi. Elorda turǵyndary úshin eń aldymen gazdy «Kóktal-1,2», «Jeleznodorojnyı», «ıÝgo-Vostok» aýdandaryna jáne 1,2,3 jylý elektr stansalaryna jetkizý josparlanǵan.