EQDB QazTransGazdyń ekologııany jaqsartýǵa qosqan úlesin joǵary baǵalady
NUR-SULTAN. QazAqparat - Eýropalyq qaıta qurý jáne damý banki (EQDB) kezekti jıynynda turaqty damý salasyndaǵy qyzmeti úshin birqatar jeńimpazdy marapattady, dep habarlaıdy QazAqparat.
EQDB-niń bıylǵy altyn, kúmis jáne qola júldeleri ekologııa men áleýmettik baǵytty qamtyǵan túrli sanattaǵy atalymdar boıynsha 21 kompanııanyń ókilderine tabys etildi. «Kómirqyshqyl gazy shyǵaryndylaryn azaıtýdaǵy jetistikteri úshin» altyn medaldi elimizdiń ulttyq operatory «QazTransGaz» AQ jeńip aldy.
2016 jyly ornatylǵan yntymaqtastyq aıasynda elimizdiń gaz ınfraqurylymyn jańǵyrtýǵa baǵyttalǵan ınvestıtsııalyq jobalar júzege asyryldy. Ulttyq operatordyń enshiles kompanııalary - «Intergaz Ortalyq Azııa» AQ men «QazTransGaz Aımaq» AQ bankpen shart jasasty. Nátıjesinde
«Bozoı» jerasty gaz qoımasy jańartylyp, Qazaqstannyń ońtústik óńirlerine jetkiziletin gaz kólemi ulǵaıdy jáne eki iri qala - Almaty men Shymkenttegi aýaǵa taraıtyn zııandy zattar kólemi aıtarlyqtaı azaıdy. Investıtsııalyq jobalardy iske asyrý aıasynda Mańǵystaý oblysynda 104 km jańa gaz qubyrlary salynyp, 533 km qubyr jańǵyrtyldy. Aqtóbe oblysynda qýattylyǵy saǵatyna 300 myń tekshe metr AGTS-300 jańa avtomatty gaz taratý stantsııasynyń qurylysy ishinara qarjylandyryldy. Qostanaı oblysynda 4 aýyl men Rýdnyı qalasy gazdandyryldy.
Gaz mamandary EQDB-men aradaǵy yntymaqtastyqty jalǵastyra otyryp, 2060 jylǵa qaraı Qazaqstandaǵy aýaǵa taraıtyn kómirtegi kólemin barynsha azaıtýǵa qol jetkiziletinine senim bildirdi.
