EQDB Qazaqstannyń «jasyl ekonomıkaǵa» ótý týraly zań jobasyn 1 mln. eýroǵa ázirlegen
ASTANA. QazAqparat - Eýropa Qaıta qurý jáne Damý banki Qazaqstannyń «jasyl ekonomıkaǵa» ótý týraly zań jobasyn 1 mln. eýroǵa ázirlegen. Alaıda, Esep komıteti atalǵan fýnktsııa tikeleı Ekonomıka jáne bıýdjettik josparlaý mınıstrligine jatatynyn alǵa tartyp otyr.
«Eýropalyq Qaıta qurý jáne Damý banki Qazaqstan Respýblıkasynyń keıbir zańnamalyq aktilerine «jasyl ekonomıkaǵa» ótý boıynsha ózgerister engizý týraly zań jobasyn 1 mln. eýroǵa ázirlegen. Alaıda, atalǵan jumys mınıstrliktiń tikeleı fýnktsııasyna jatady. Bul rette vedomstvo tek sheteldik uıym daıyndaǵan zań jobasyn qaraýdy uıymdastyrý jónindegi sharalardy ǵana oryndady», - delingen Respýblıkalyq bıýdjettiń atqarylýyn baqylaý jónindegi esep komıtetiniń taratqan baspasóz baıanynda.
Budan bólek, Esep komıteti mınıstrliktiń ınvestıtsııalyq jáne kontsessııalyq jobalardy irikteý, olardyń tehnıkalyq-ekonomıkalyq negizdemelerin ázirleý, qarjylandyrýǵa ekonomıkalyq saraptamany júrgizý sharalaryn bir ózin ǵana oryndap, ony bólý kezinde múddeler qaqtyǵysy oryn alǵanyn anyqtap otyr.
Toqtala ketetin jaıt, Esep komıtetiniń otyrysynda Ekonomıka jáne bıýdjettik josparlaý mınıstrliginiń jekelegen bıýdjettik baǵdarlamalardy iske asyrýǵa bólingen qarajatty paıdalaný tıimdiligi, sondaı-aq memlekettik qarjylyq baqylaý standarttarynyń saqtalýy talqylanǵan bolatyn.
