EQDB Qazaqstannyń 2018 jylǵy ekonomıkalyq ósimine boljam jasady
ASTANA. QazAqparat - 2018 jyly Qazaqstannyń ishki jalpy ónimi 3,5-4 paıyz ósim kórsetedi. Mundaı boljamdy búgin Eýropalyq qaıta qurý jáne damý banki dırektorynyń orynbasary, bas óńirlik ekonomısi Hans Holtshakker jasady, dep habarlaıdy QazAqparat.
«Halyqaralyq boljam barynsha qolaıly bolyp tur. Álemde, Eýropa men Qytaıda ósim baıqalady. Munaı baǵasy da barreline 60 dollardan joǵary qalyptasady. Bul halyqaralyq ortanyń barynsha qolaıly ekendigin kórsetedi jáne bul Qazaqstan ekonomıkasy ósimi qarqynynyń artýyna ákeledi. Shynaıy ishki jalpy ónim ósimi 3,5-4 paıyz tóńireginde bolady», - dedi ol.
Onyń aıtýynsha, Qazaqstan eksportynyń artýy, ınvestıtsııa kóleminiń eselene túsýi, tutynýshylardyń shynaıy kiristeriniń kóbeıýi de oryn alatyn bolady. Sonymen qatar fıskaldyq ustanymdylyq pen barynsha joǵary ımport ta ekonomıka ósiminiń negizgi faktoryna aınalady.
«Belgili bir deńgeıdegi baıaýlaýdan keıin ekonomıka óse bastaǵan kezde ınflıatsııa azdap tómendeıdi. Degenmen, aıta qoıarlyqtaı qatty tómendep ketpeıtindigi anyq. Jalpy ınflıatsııa Ulttyq bank belgilegen shekte bolady», - dedi Hans Holtshakker.
