EQDB Qazaqstan ekonomıkasyna 1,3 mlrd eýrodan astam ınvestıtsııa salýy múmkin
ASTANA. KAZINFORM – Oljas Bektenov EQDB, ExxonMobil jáne Marubeni basshylyǵymen ınvestıtsııalyq yntymaqtastyq máselelerin talqylady. Bul týraly Úkimettiń baspasóz qyzmeti habarlady.
Premer-mınıstr Oljas Bektenov Astanaǵa QR Prezıdenti janyndaǵy Sheteldik ınvestorlar keńesiniń 38-shi plenarlyq otyrysyna qatysý úshin kelgen Eýropalyq qaıta qurý jáne damý bankiniń prezıdenti Odıl Reno-Basso, ExxonMobil-diń aǵa vıtse-prezıdenti Pıter Larden jáne Marubeni Corporation-nyń basqarýshy atqarýshy dırektory Satorý Ichınokavamen birqatar kezdesý ótkizdi.
Kezdesýler barysynda Qazaqstan Prezıdenti Qasym-Jomart Toqaevtyń Parlament palatalarynyń birlesken otyrysynda Úkimettiń aldyna qoıǵan ekonomıkany damytý jáne jańa ınvestıtsııalyq tsıkldy júzege asyrý jónindegi mindetteri turǵysynda yntymaqtastyqty odan ári keńeıtý perspektıvalary talqylandy.
EQDB prezıdenti Odıl Reno-Bassomen kezdesýde qurylys jáne áleýmettik, kóliktik, ónerkásiptik, ınjenerlik ınfraqurylymdy jańǵyrtý, tsıfrlandyrý jáne jasandy ıntellekt salasyndaǵy ınvestıtsııalyq yntymaqtastyqty arttyrý, sondaı-aq qarjy salasyndaǵy ózara is-qımyldy nyǵaıtý jáne bıznesti qoldaý sharalary jónindegi máseleler talqylandy.
Premer-mınıstr Banktiń Qazaqstandaǵy ınvestıtsııalyq ahýaldy jaqsartýdaǵy jáne el ekonomıkasynyń turaqty damýyndaǵy mańyzdy rólin atap ótti. Birlese jumys istegen jyldarda EQDB portfeli shaǵyn jáne orta bıznes, qarjy, turǵyn úı-kommýnaldyq sharýashylyq, energetıka, aýyl sharýashylyǵy jáne aqparattyq tehnologııalar salalarynda jalpy somasy $12,7 mlrd bolatyn 354 jobaǵa jetti.
Odıl Reno-Basso bıyl EQDB-nyń Qazaqstan ekonomıkasyna ınvestıtsııa kólemi tarıhı deńgeıge jetetinin habarlady: búgingi kúni Qazaqstanda 800 mln eýrodan astam somaǵa jobalar qarjylandyryldy. Jalpy, jyl qorytyndysy boıynsha ınvestıtsııalar aǵyny 1,3 mlrd eýrodan asýy múmkin dep kútilýde.
Kezdesý qorytyndysy boıynsha taraptar yntymaqtastyqty odan ári keńeıtýge jáne jańa birlesken jobalardy júzege asyrýǵa daıyn ekendikterin atap ótti.
ExxonMobil aǵa vıtse-prezıdenti Pıter Lardenmen kelissózder barysynda aǵymdaǵy óndiristik kórsetkishter jáne odan ári tehnologııalyq damý máseleleri qaraldy. ExxonMobil iri birlesken jobalardy — Teńiz, Qashaǵan, Kaspıı qubyr konsortsıýmyn júzege asyrýǵa qatysady. Taraptar yntymaqtastyqtyń jemisti sıpatyn atap ótip, ózara is-qımyldy odan ári nyǵaıtýǵa daıyndyǵyn rastady.
Marubeni Corporation basqarýshy atqarýshy dırektory Satorý Ichınokavamen kezdesýde qazaq-japon ekonomıkalyq yntymaqtastyǵyn odan ári damytý perspektıvalary talqylandy. Marýbenı Qazaqstannyń energetıka jáne ónerkásiptik óndiris salasyndaǵy uzaqmerzimdi jáne senimdi seriktesi bolyp sanalatyny atap ótildi. Taraptar iskerlik baılanystardy odan ári nyǵaıtýdyń jáne eki eldiń bıznes-qaýymdastyqtary arasyndaǵy praktıkalyq ózara is-qımyldy keńeıtýdiń mańyzdylyǵyn sóz etti.
Kezdesýlerdiń qorytyndysy boıynsha taraptar ózara tıimdi yntymaqtastyqty odan ári nyǵaıtýǵa, qoldanystaǵy jobalardy júzege asyrýǵa jáne Qazaqstan ekonomıkasynyń basym sektorlarynda jańa ınvestıtsııalyq bastamalardy pysyqtaýǵa múddeliligin rastady.
Aıta ketelik Oljas Bektenov QR Prezıdenti janyndaǵy Sheteldik ınvestorlar keńesiniń aldaǵy otyrysyna qatysýshylarmen birqatar kezdesý ótkizgen edi.
