EQDB basshysy: Qazaqstan - úlgili seriktes
LONDON. QazAqparat - Londonǵa saparmen barǵan QR Syrtqy ister mınıstri Qaırat Ábdirahmanov Eýropanyń qaıta qurý jáne damý bankiniń prezıdenti Sýma Chakrabartımen kezdesti, dep habarlaıdy «QazAqparat» HAA QR SІM baspasóz qyzmetiniń habarlamasyna silteme jasap.
«Qazaqstannyń syrtqy saıası vedomstvosy basshysynyń Londonǵa saparynyń mańyzdy basymdylyǵy aldaǵy ýaqytta saýda-ekonomıkalyq jáne ınvestıtsııalyq yntymaqtastyqty damytý boldy», - delingen habarlamada.
Eýropalyq qaıta qurý jáne damý bankiniń prezıdenti Sýma Chakrabartımen kezdesý barysynda aǵymdaǵy jáne perspektıvalyq birlesken jobalar talqylandy. EQQDB basshysynyń aıtýynsha, Qazaqstan banktiń úlgili seriktesi bolyp tabylady. Sońǵy jyldary memleket jáne jeke sektormen birlesken jobalardyń sany aıtarlyqtaı ósti jáne Qazaqstannyń aımaqtaǵy jáne álemdegi róli ulǵaıdy. EQDB memlekettik-jekemenshik seriktestik jobalaryn jáne «Bir belbeý - bir jol» bastamasyn iske asyrýda, sondaı-aq syrtqy naryqtarda el marketıngin damytýda Qazaqstanmen yntymaqtastyqty nyǵaıtýǵa nıetti.
Mınıstrdiń Londondaǵy «Chatam Haýs» Koroldik halyqaralyq qatynastar ınstıtýtynda sóılegen sózi Qazaqstannyń BUU Qaýipsizdik Keńesine 2018 jyly qańtardaǵy tóraǵalyǵynyń basymdyqtaryna arnaldy. Bul týraly QR SІM baspasóz qyzmeti habarlady.
SІM basshysy Prezıdent Nursultan Nazarbaevtyń ıadrolyq qarýdan azat álemdi qurý, álemdik jáne dástúrli dinder lıderleriniń sezderin shaqyrý sııaqty bastamalaryna jan-jaqty toqtalyp ótti. Sonymen qatar, SІM basshysy Qazaqstannyń BUU Qaýipsizdik Keńesiniń múshesi retinde Ortalyq Azııadaǵy qaýipsizdik, Afrıkadaǵy beıbitshilik pen turaqtylyq, halyqaralyq terrorızmge qarsy turý, Sırııadaǵy daǵdarysty retteý, Aýǵanstandaǵy jaǵdaıdy retteý máselelerine jáne BUU reformalaryna erekshe nazar aýdaratyny týraly atap ótti. Kezdesýge qatysýshylar «EKSPO-2017» murasyna jáne AHQO jobalaryna, Jasyl tehnologııalardyń halyqaralyq ortalyǵyna jáne t.b. qyzyǵýshylyq tanytty.
Londonǵa sapary barysynda Q.Ábdirahmanov brıtan parlamentiniń depýtattarymen, Bob Stıýart tóraǵalyq etetin Qazaqstanmen yntymaqtastyq jónindegi búkilpartııalyq tobynyń múshelerimen kezdesti. Mınıstr brıtandyq parlament múshelerin Prezıdent N.Nazarbaevtyń «Bolashaqqa baǵdar: Rýhanı jańǵyrý» atty maqalasynyń negizgi erejelerimen tanystyrdy, «100 naqty qadam» baǵdarlamasy men jekeshelendirý baǵdarlamasyn iske asyrý týraly, sondaı-aq «Astana» halyqaralyq qarjy ortalyǵyn qurý jáne damytý boıynsha joba týraly aıtty. Qazaqstanmen yntymaqtastyq jónindegi búkilpartııalyq top músheleri qazaqstandyq-brıtandyq qarym-qatynastardyń damý serpinin joǵary baǵalap, birlesken jobalardy iske asyrý úshin qoldaý kórsetýge daıyn ekenin bildirdi.
Syrtqy ister mınıstriniń bedeldi kásipkerler - Brıtan-Qazaq Qoǵamy múshelerimen kezdesýiniń kún tártibinde iskerlik yntymaqtastyq máselelerine erekshe nazar aýdaryldy. Qazaqstan Respýblıkasynyń munaı jobalarynan basqa salalaryna ınvestıtsııa salýǵa qyzyǵýshylyq tanytqan «Independent Power Corporation» jáne «United Green» kompanııalarynyń basshylarymen jeke kezdesýler barysynda Qazaqstan ekonomıkasyna ınvestıtsııalaý jáne jańa óndiris oryndaryn ashý máseleleri talqylandy.
Sapar sońynda Q.Ábdirahmanov Ulybrıtanııada «Bolashaq» baǵdarlamasy boıynsha bilim alatyn qazaqstandyq stýdentter qaýymdastyǵymen kezdesti. Syrtqy ister mınıstri shetelde bilim alǵan jas qazaqstandyqtar keshendi jańǵyrtý boıynsha strategııalyq maqsattardy júzege asyrýda jáne álemniń eń damyǵan 30 eliniń qataryna kirýge eleýli úles qosatyndyǵyn atap ótip, stýdentterge oqýda tabystar tiledi.
