Ekibastuzǵa jylý berý jónindegi jedel shtab otyrysy ótti

Pavlodar oblysynyń ákimi Asaıyn Baıhanov Ekibastuzdy jylytý maýsymyna daıyndaý jónindegi jedel shtabtyń otyrysyn ótkizdi, dep habarlaıdy QazAqparat.

Óńir ákiminiń baspasóz qyzmetinen málim etkendeı, Ekibastuzda barlyq qyzmetter kúsheıtilgen jumys rejımine kóshirilgen.

Búgin tańerteń qalanyń Jylý elektr ortalyǵynda 2 qazandyq iske qosyldy. JM-7 jáne JM-10 jylý jelileri tolyǵymen toltyryldy. Kún sońyna deıin taǵy bes magıstral – JM 1, 3, 5, 8, 12-ni toltyrý josparlanǵan.

Óńir basshysy barlyq jylý jelilerin muqııat qadaǵalaýdy jáne turǵyndar tarapynan qandaı da bir suraqtar týyndaǵan jaǵdaıda ótinishterine jedel den qoıýdy tapsyrdy.

«Osydan keıin Asaıyn Baıhanov birneshe kópqabatty turǵyn úıdi aralap, olardyń jylý qabyldaýǵa daıyndyqtaryn tekserdi. Sondaı-aq Pishembaev kóshesi boıyndaǵy jeke sektor turǵyndarymen kezdesti, olar úıleriniń mańyndaǵy sýmen jabdyqtaý jelisiniń jóndeý jumystarynyń barysyn tekserýdi surady. Ýchaskedegi jumystar kestege sáıkes júrgizilýde, jeliniń tozǵan ýchaskesi aýystyrylyp jatyr. Jumystardy kelesi aptanyń sońyna deıin aıaqtaý josparlanǵan», - delingen oblys ákimdigi málimetinde.