Ekibastuzdyń jylý magıstralinde fontan atqylady: Oblys ákimi jaǵdaıdy túsindirdi
Pavlodar oblysynyń ákimi Asaıyn Baıhanov keshe Ekibastuzdyń jylý magıstralinde bolǵan tótenshe jaǵdaıǵa baılanysty túsinik berdi. QazAqparat bul týraly óńir ákimdiginiń baspasóz qyzmetine silteme jasap habarlaıdy.
Málim etilgendeı, qazir Ekibastuz JEO-daǵy jóndeý jumystary kestege sáıkes júrgizilip jatyr. Búgingi tańda 3 energetıkalyq qazandyq paıdalanýǵa daıyn jáne jylý berý maýsymy bastalǵanǵa deıin taǵy 3 sý jylytatyn qazandyq agregaty daıyn bolady. Qalǵan 4 qazandyqty jóndeý qazan aıynyń sońyna deıin aıaqtaý josparlanýda.
Abaı kóshesindegi 3 jylý magıstralin (№4 mektepten Marǵulan kóshesine deıin) qaıta jańartý jumystary tolyǵymen aıaqtaldy. Atalmysh 3 magıstral joǵary qysymmen synaqtan ótkizilip, qazir jýý jumystary júrgizilýde.
26 qyrkúıek kúni M. Júsip kóshesi boıyndaǵy JM-2 magıstralin (Dostyq dúkeninen «Qazaqstan» kınoteatry aıaldamasyna deıin) de synaqtan ótkizý jumystary jasalǵan. Alaıda, jylý magıstralindegi jańa jáne eski qubyrlardyń túıisken jerin qosatyn tyǵyzdaǵysh kompensator ajyrap ketti. Qubyrlar zaqymdalmaǵan.
Ákimdik aqparatyna sensek, búgin túske deıin aqaý joıylady, sodan keıin osy magıstraldyq jelini synaý jáne jýý jumystary qaıta jalǵasady.
«Atqarylyp jatqan jumystar boıynsha túsindirý jumystaryn júrgizý qajet. Jańa jeliler joǵary qysymmen tekserilýde, óıtkeni, osal tustaryn anyqtap, anyqtalǵan aqaýlardy birden joıý úshin», –dep atap ótti oblys ákimi.
Ákimdik aqparatyna súıensek, kóktemde jáne kúzde Ekibastuzdyń jylýmen jabdyqtaý jelilerinde barlyǵy 388 aqaý joıylǵan. Qala turǵyndarynan túsken shaǵymdar boıynsha problemaly 14 ýchaskede jumystar jalǵasyp jatyr.
690 kópqabatty turǵyn úıdiń 665-i jylýdy qabyldaýǵa tolyqtaı daıyn. 25 turǵyn úıde ishki jylytý júıelerin jóndeý, jýý, syǵymdaý jumystary aıaqtalýǵa jaqyn.
«1 qazannan bastap Ekibastuzda jylý berý maýsymyn bastaý josparlanýda. Jylýdy qabyldaýǵa daıyndyq boıynsha barlyq jumystar ýaqytynda jáne barynsha sapaly oryndalýy qajet. Kommýnaldyq qyzmetter táýlik boıy jumys rejımine kóshýi kerek. Jylýmen jabdyqtaýdy bastaý bir bólek, alaıda, júıeni teńdestirý de mańyzdy. Jylý jelileri qyzmetteri men qalalyq turǵyn úı ınspektsııasy bólimi tarapynan ishki jylýmen jabdyqtaý júıelerin retteý jáne shetki úılerdegi gıdravlıkalyq parametrlerdi teńdestirý boıynsha úılesimdi jumys qajet», – dep tarsyrma berdi Asaıyn Baıhanov jylý jelilerin tekserý kezinde.