Ekibastuzdyń biraz bóliginde jylý batareıalary sýyp ketti

Ekibastuzdyń kópqabatty úıleriniń biraz bóliginde tańerteńnen jylý parametrleri tómendegen. Bul jaǵdaı magıstraldegi jóndeý jumystaryna baılanysty bolǵan, dep habarlaıdy Kazinform.

Qalanyń ońtústik bóligindegi kósheler, sondaı-aq Shákárim, Áýezov, Dúısembaev, Shashkın, Sátbaev kósheleriniń turǵyndary jylý batareıalary tańerteńnen salqyndap ketkenine alańdaýly. Keıbir kópqabatty baspanalarda ystyq sý joq. Jurtshylyq jylý-elektr ortalyǵynda taǵy bir jaǵdaı bolyp qaldy eken dep úreılendi.

«Ekibastuz jylý-energo» JShS ókilderiniń habarlaýynsha, №5 jylý magıstralindegi bekitý armatýrasyn montajdaý úshin búgin saǵat 8.00 men 12.00 aralyǵynda keıbir aýmaqtarda parametrler tómendegen. 

«Bul ıÝjnyı 14, ıÝjnyı 15, ıÝjnyı 11 kóshelerinde ornalasqan úılerdiń jylý sapasyn kóterý úshin jasalyp jatqan is-shara. Jumystar aıaqtaldy, jaqyn ýaqytta úıler jylýǵa tolyq qol jetkizedi. JEO shtattyq rejimde jumys istep tur. 6 agregat is ústinde. Stansadan shyǵatyn jylýdyń temperatýrasy - 90 gradýs, aınalyp keletin ystyq sýdyń qyzýy 63 gradýs», - dep habarlady jylý ortalyǵy.

Buǵan deıin Ekibastuzda 1 aqpannan bastap jylý tarıfi ózgeretini týraly habarlaǵan edik.