Ekibastuzdyq monopolıster óz tutynýshylarynan kórsetilmegen qyzmet úshin tólemaqy óndirip kelgen

PAVLODAR. KAZINFORM - «Pavlodarenergosbyt» JShS men «Ekibastuzteploenergo» JShS byltyr jazda ystyq sýmen jabdyqtaý qyzmeti úshin ekibastuzdyq turǵyndardan tólem óndirgen. Shyn máninde shaharda ystyq sý birneshe aı bolmaǵan.

Bul týraly Tabıǵı monopolııalardy retteý komıtetiniń Pavlodar oblysy boıynsha departamenti habarlady.

«Pavlodar oblysy prokýratýrasynyń usynysyn qaraý sheńberinde, «Pavlodarenergosbyt» JShS men «Ekibastuzteploenergo» JShS-nyń 2023 jyldyń maýsym-tamyz aılary aralyǵyndaǵy kezeńde ystyq sýmen jabdyqtaý qyzmetteriniń qunyn qyzmetter naqty bolmaǵan jaǵdaıda óndirip alǵany anyqtaldy. Tabıǵı monopolııalardy retteý komıtetiniń Pavlodar oblysy boıynsha departamenti «Pavlodarenergosbyt» JShS jáne «Ekibastuzjylýenergo» JShS-na qatysty QR ÁQBtK-niń 164-babynyń 5-bóligimen ákimshilik is qozǵady» dep málimdedi departamentten.

Sýbektiler tutynýshylarǵa qaıta esepteýler júrgizdi. Ol 2024 jyldyń aqpan aıy úshin túbirtekterde kórsetiledi.