Ekibastuzdyq kásipker aýyl mektebine qosymsha ǵımarat salyp berdi
PAVLODAR. KAZINFORM — Ekibastuz qalasyna qarasty Zelenaıa roşa aýylyndaǵy oqýshylar jańa oqý jylynda tamasha syılyqqa keneldi. «Tabys» sharýa qojalyǵynyń basshysy Manat Alǵambarov óz qarajaty esebinen aýyl mektebiniń bastaýysh synyptaryna arnalǵan qosymsha ǵımarat salyp bergen. Nátıjesinde budan bylaı mektep oqýshylary bir aýysymda oqı alady.
Zelenaıa roşa aýylyndaǵy mekteptiń negizi 1964 jyly qalanǵan. Biraq nysan ábden eskirgenine baılanysty 2018 jyly jergilikti bıýdjet esebinen jalpy aýmaǵy 1020 sharshy metr bolatyn jańa ǵımarat turǵyzylǵan. Peshpen jylytylatyn eski júıeniń ornyna modýldik qazandyq ornatyldy. Sol kezde «Tabys» ShQ qoldaýymen sport zaly da salynǵan bolatyn. Endi bıyl kásipker Manat Alǵambarov mektepke kezekti syıylyǵyn jasady. Onyń jeke qarajatyna aýmaǵy 143 sharshy metr qosymsha ǵımarat turǵyzyldy. Onda bastaýysh synyp balalary oqıdy dep kútiledi.
Osy ýaqytqa deıin oryn jetispeýshiligine baılanysty mekteptiń bastaýysh synyptary eki aýysymda oqyp kelgen. Endi bastaýyshtaǵy 19 bala oqýlaryn jańadan salynǵan keń ári jaryq kabınetterde bastaıdy. Al joǵary synyptar 2018 jyly salynǵan mektep ǵımaratynda oqýyn jalǵastyrady.
Pavlodar oblysynyń ákimi Asaıyn Baıhanov mektepke robot-tehnıka kabınetiniń jabdyqtaryn jáne sport quraldaryn satyp alýǵa 30 mln teńgege sertıfıkat tabystady.
Eske sala keteıik, Pavlodar mektepterinde 6 myńnan astam oryn tapshylyǵy bar.
