Ekibastuzdyq er adam qos azamattyǵyn 18 jyl boıy jasyryp kelgen

PAVLODAR. KAZINFORM – Ol kórshi eldiń azamattyǵyn qabyldaı tura, uzaq ýaqyt qazaqstandyq tólqujatty paıdalanyp kelgen. Kináli tulǵa jaýapkershilikke tartylyp,  369 myń teńge aıyppul arqalady. 

Jyl basynan Pavlodar oblysynda 463 adamnyń QR azamattyǵynan shyǵýy tirkelgen. Onyń 457-si ózge memlekettiń azamattyǵy bar ekeni týraly ózdiginen habarlaǵan.

– Ózge memlekette azamattyǵy bola tura, qazaqstandyq qujattardy paıdalanyp kelgen 3 azamat anyqtaldy. Taǵy 11 tulǵa basqa memlekettiń azamattyǵyn alǵany týraly belgilengen merzimde habarlamaǵany úshin jaýapqa tartyldy. Polıtseıler bizdiń memlekettiń azamaty bola tura, 2006 jyldan kórshi eldiń tólqujatyn alyp, ári onysyn jasyryp kelgen Ekibastuz qalasynyń turǵynyn da anyqtady. Ol osy ýaqytqa deıin qazaqstandyq qujattardy emin-erkin paıdalanǵan, - deıdi Pavlodar oblysy polıtsııa departamenti kóshi-qon qyzmeti basqarmasynyń bastyǵy Dáýlet Ysqaqov.

Zań buzǵan azamat ákimshilik jaýapkershilikke tartylyp, 369 200 teńge somasynda aıyppul salyndy.