Ekibastuzdyq dáriger ushaqta jolaýshynyń ómirin qutqardy
PAVLODAR. KAZINFORM - Anar Kúrkebaıqyzy Ekibastuzdaǵy №3 emhanada jalpy tájirıbe dárigeri bolyp eńbek etedi. Ol bilimin jetildirý úshin Chehııa eline ushyp bara jatqan.
Astana – Praga baǵytyndaǵy jolaýshylar ushaǵynda áıel adamnyń densaýlyq jaǵdaıy kenetten kúrt nasharlap, esinen tanyp qalǵan. Abyroı bolǵanda bul reıste ekibastuzdyq dáriger Anar Kúrkebaıqyzy bolyp, ol naýqastyń ómirine arasha túsken.
- Ushaq áýejaıdan kóterilgen soń arada bir saǵattaı ýaqyt ótkende jolaýshynyń birine medıtsınalyq kómek qajet ekeni týraly habarlandy. Muny estip birden naýqastyń janyna bardym. Jasy shamamen elýlerdegi áıel adam sulq túsip, esinen tanǵan. Qan qysymy tómendep ketken. Shuǵyl túrde alǵashqy medıtsınalyq kómek kórsetip, aıaqtaryn joǵary kótertkizdim. Qajetti em-dom jasaǵan soń naýqas esin jııa bastady. Aıtýynsha, eshbir medıtsınalyq esepte turmaǵan, mundaı jaǵdaıǵa birinshi kezigip otyr. Naýqastyń janynda bir saǵattaı bolyp, áýejaıǵa aman-esen kelip qondyq, - deıdi dágriger.
Áýejaıda áıel adam jedel járdem kómeginen bas tartyp, ózin jaqsy sezinetinin jetkizgen.
Mundaı jaǵdaı Anar Kúrkebaıqyzynyń dárigerlik tájirıbesinde alǵash ret kezdesip otyr. Aq jeleńdi abzal jan buǵan deıin klınıkalyq ólimge tap bolǵan adamdy qutqaryp qalǵanyn aıtady. Ekibastuz medıtsınalyq kolledjiniń, Semeı medıtsınalyq ýnıversıtetiniń túlegi búginde Ekibastuz qalasyndaǵy №3 emhanada jalpy tájirıbe dárigeri bolyp jumys isteıdi. Ýchaskesindegi 1,5 myńǵa jýyq adamnyń densaýlyǵyna jaýapty. Praga qalasyna gastroenterologııa baǵytyndaǵy bilimin jetildirý úshin issaparmen barǵan.
Eske sala keteıik, buǵan deıin Jetisýlyq dáriger ushaqta jaǵdaıy kúrt nasharlaǵan jolaýshyny ajal aýzynan alyp qaldy.