Ekibastuzdyq 6 jasar álem chempıonynyń ákesi eń qymbat syılyq týraly aıtty
PAVLODAR. KAZINFORM — Djıý-djıtsýdan álem chempıony atanǵan ekibastuzdyq 6 jasar Hadııa Qunaeva jaqynda Pavlodar oblysy ákimimen kezdesip, oǵan Memleket basshysynyń atynan quttyqtaý haty men syılyq tabystalǵan. Qyzdyń ákesi óńir basshysy syılaǵan 1 mln teńgeniń sertıfıkatyn qaıda jumsaıtynyn aıtty.
Ekibastuzdyq alty jasar Hadııa Qunaeva djıý-djıtsýdan Ábý-Dabıde ótken halyqaralyq dodada KIDS 2 sanatynda mereıi ústem bolyp, álem chempıony atandy. Fınaldyq kezdesýde jetkinshek Birikken Arab Ámirliginiń ókilinen basym tústi.
Chempıon qyzdy ákesi jattyqtyrady. Bul otbasynda Hadııadan bólek taǵy bes bala djıý-djıtsýmen shuǵyldanady. Olardyń barlyǵy ákesiniń tálimin alyp júr.
42 jastaǵy ákesi Samat Qunaev qazirgi ýaqytta onyń klýbyna kelýshiler kóbeıip jatqanyn aıtady. Hadııanyń jeńisi jergilikti jasóspirimderdi sportqa jigerlendirse kerek.
— Biz úshin eń qymbat syılyq ol — Prezıdenttiń Alǵys haty. Memleket basshysynyń lebizi men demeý sózi biz úshin óte mańyzdy. Ári Prezıdentimiz qyzyma jańa aıpad syılady. Qazir kóshede kórgender meni tanyp jatady. Dostarym men tanystarym áli de quttyqtap jatyr. Oblys ákimimen kezdesýde aımaqtaǵy djıý-djıtsý boıynsha máselelerdi kóterdim. Bizde bir ǵana federatsııa bar, alaıda ol óz aldyna damı almaı otyr. Oblys ákimi bizdiń otbasymyzǵa 1 mln teńgeniń sertıfıkatyn tabystady. Buǵan deıin óz kóligimdi satyp, Abý-Dabıdegi jarysqa barǵan bolatynbyz. Odan únemdelgen qarajatty jáne syılyq aqshany qosyp, jeti adamdyq mınıven satyp alsaq degen oıymyz bar. Kólik aldaǵy ýaqytta jarystarǵa barýǵa qolaıly bola túser edi, -dep josparymen bólisti Samat Qunaev.
Jeltoqsan aıy sportshylar otbasy úshin jarystarǵa toly bolmaq. Qazir jattyqtyrýshy Samattyń klýbyndaǵy sportshylar qyzý daıyndyq ústinde.