Ekibastuzdaǵy jylý irkilisi kúl shyǵaratyn qubyrdyń bitelýinen bolǵan – oblys ákimi
Aqmola jáne Pavlodar oblystarynyń ákimderi Úkimet otyrysynda jylý júıesinde aqaý tirkelgen qalalardyń jaǵdaıy týraly málimet berdi, dep habarlaıdy Kazinform.
Aqmola oblysynyń ákimi Marat Ahmetjanovtyń aıtýynsha, Stepnogorsk qalasynda 7 jeltoqsan kúni saǵat 21.45-te jáne Kókshetaý qalasynda 10 jeltoqsan kúni saǵat 19.00-de jylýmen jabdyqtaý toraptarynda jarylys bolǵan.
«Stepnogorsk qalasynda jedel shtab quryldy. Jylýmen jabdyqtaý magıstralindegi apat 1 táýlik ishinde joıyldy. Barlyq jóndeý, qalpyna keltirý jumystary júrgizildi. Qalany jylýmen jabdyqtaý tolyq kólemde qalpyna keltirildi. Temperatýra jumys normasyna deıin jetkizildi. Aýa raıyna baılanysty jedel shtab áli jumys istep tur. Azamattardyń ótinishine ýaqytyly den qoıý úshin jergilikti jumys toptary jumys istep jatyr. Kókshetaý qalasyndaǵy qubyrǵa kelgen zaqym táýlik ishinde joıyldy. Jóndeý jumystary kezinde úılerdegi ystyq sý aǵyzylǵan joq. Bul páterlerdegi temperatýrany normatıvke saı ustap turýǵa múmkindik berdi. Jalpy jylytý maýsymy shtattyq rejımde ótip jatyr. Shaǵyn olqylyqtardyń bárine jedel brıgada der kezinde den qoıyp otyr», - dedi ákim.
Pavlodar oblysynyń ákimi Asaıyn Baıhanov kómir ornyna mazýt jaǵý tásili Ekibastuzdaǵy apattyń saldaryn jeńildetýge múmkindik bergenin aıtty.
«Jeltoqsannyń 9-ynan 10-yna qaraǵan túni Ekibastuz jylý-energetıkalyq ortalyǵynda sý jylytý qazandyq agregattarynda kúl shyǵarýǵa arnalǵan sý qubyry zaqymdaldy. Bul rette «Ekibastuz JEO»-ǵa tıesili qazandyqtardyń eshqaısysy toqtamaǵanyn, qalany jylýmen jabdyqtaý úzilmegenin, bir de bir nysan jylýsyz qalmaǵanyn atap ótken jón», - dedi oblys basshysy.
