Ekibastuzdaǵy jylý ortalyǵy daıyndyq pasportyn alýǵa ótinim berdi

PAVLODAR. KAZINFORM - Buǵan deıin Ekibastuz JEO-da jylý maýsymy aldyndaǵy jóndeý jumystary júrgizilgen. Jeti qazandyq bútindeldi.

«Energy Solutions Center» JShS (Ekibastuz JEO) jylý berý maýsymyna daıyndyq pasportyn alý úshin qajetti qujattamany ázirledi. Qazirgi ýaqytta tıisti qujattar Pavlodar oblysynyń ýákiletti organy tarapynan tekserilip, kelisilgen jáne 8 qyrkúıekke deıin daıyndyq pasportyn alý úshin ortalyq memlekettik organǵa ótinim beriledi.

- Bıyl paıdalanýshy uıymnyń qarajaty esebinen 7 qazandyq agregatynda óndeý jumystary aıaqtaldy. Ózge jóndeý jumystary bekitilgen kestege sáıkes jalǵasyp jatyr. Úkimettiń jáne oblys ákimdiginiń qoldaýymen jalpy uzyndyǵy 5 km-den asatyn eki jylý magıstralin qaıta jańartý júrgizildi. Qazirgi tańda bul ýchaskelerde qubyrlardy montajdaý jumystary aıaqtaldy. Gıdravlıkalyq synaqtar men jylý jelilerin shaıý sátti ótkizildi. Tutynýshylarǵa ystyq sý tolyq kólemde berildi, - dep habarlady qalalyq ákimdikten.

Jalpy jyl basynan beri oramishilik jelilerge aǵymdaǵy jóndeý jumystary sheńberinde bıýdjet esebinen 345 ýchaskede jumystar júrgizilip, 12 shaqyrymnan astam jeli aýystyrylǵan. Budan bólek, «Ekibastuz jylý jelileri» jaýapkershiligi shekteýli seriktestiginiń kúshimen uzyndyǵy 5,5 km jylý jelileri kúrdeli jóndelgen. - Shaharda kóppáterli 705 turǵyn úı. 5 qyrkúıektegi jaǵdaı boıynsha 675 turǵyn úı jylý berý maýsymyna tolyq daıyn. Qalǵan úılerde ishki ınjenerlik júıelerin jóndeý jumystary júrgizilip jatyr, olardy aıaqtaý merzimi 10 qyrkúıekke josparlanǵan. Jylý berý maýsymyna daıyndyq boıynsha barlyq jumystar kestege sáıkes oryndalyp jatyr, - dep qosty ákimdikten.

Ekibastuzda 20 shaqyrymnan astam jeliler jóndelgeni týraly jazǵanbyz.

Al onyń aldynda Premer-mınıstr jylý berý maýsymyna daıyndyǵy tómen óńirlerdi synaǵan. Onyń ishinde Ekibastuz da bar.