Ekibastuz jylý ortalyǵy aıazdy kúnderge daıyndalyp jatyr

Ekibastuzdaǵy jylý-energııa ortalyǵy turǵyn úılerge jylý joǵalmaı jetý úshin qubyrlardy oqshaýlap jatyr, dep habarlaıdy Kazinform.

«Ekibastuzjylýenergo» kompanııasy qańtar aıynyń basynan beri jylý júıesindegi qubyrlardy jylý oqshaýlaý materıaldarymen qaptaý jumystaryn jalǵastyrýda. Bir apta ishinde jalpy uzyndyǵy 413 metr qubyr qaptalǵan. Kásiporynnan habarlanǵandaı, mekeme mamandary buryn montajdalǵan ýchaskelerdi de tekserip, aqaý shyqqan jerlerdegi oqshaýlaǵysh materıaldardy qalpyna keltirip jatyr. Qubyrlardaǵy jylý tasymaldaǵyshtardyń ishki qyzýyn qalypty ustap turý úshin jylý oqshaýlaǵyshtardy qoldaný óte tıimdi. Bul jylýdyń joǵalýyn tómendetip, qala turǵyndaryna sapaly qyzmet kórsetýge múmkindik beredi» delingen málimdemede.

2023 jyly qala boıynsha jalpy uzyndyǵy 50 271 metr jylý qubyrynyń oqshaýlaǵyshtary qalpyna keltirilgen.

Eske sala keteıik, ótken jyldyń 10 jeltoqsan kúni Ekibastuz jylý elektr ortalyǵynyń kúl shyǵaratyn qubyrynda aqaý anyqtalyp, saldarynan shahardaǵy turǵyn úıler sýyp ketken edi. 

Sınoptıkter aldaǵy kúnderi elimizde kún kúrt sýytyp, 25-30 gradýs aıaz qaıta oralady dep boljap otyr.