Ekibastuzdaǵy jańa zaýyttarǵa zııandy zattardy ustaıtyn súzgiler ornatyldy

ASTANA. KAZINFORM – Pavlodarda ındýstrııalyq ósimdi saqtaı otyryp, lastaýshy zattardy azaıtýǵa basymdyq berilip otyr. Bul sharalar týraly oblys ákimi Asaıyn Baıhanov eseptik kezdesýinde aıtty.

Ákimniń aıtýynsha, iri kásiporyndarda keshendi ecofriendly sheshimder engizilip jatyr.

Al jańa salynyp jatqan nemese qurylysy bastalatyn zaýyttarda eń zamanaýı, ekologııaǵa zııany az tehnologııalardy qoldaný talap etiledi.

– Mysaly, sońǵy bir aıda Ekibastuzda ashylǵan eki jańa ferroqorytpa zaýytynda 99,8% zııandy zattardy ustaı alatyn zamanaýı gıbrıdti súzgiler ornatyldy. ERG tobynyń tórt iri kásipornynda 178 mlrd teńge kóleminde keshendi ekologııalyq sharalar atqarylýda. Bul atalǵan qaldyqtardy 50 myń tonnaǵa, ıaǵnı 57%-ǵa deıin azaıtýǵa múmkindik beredi, – dedi A. Baıhanov elordada Ortalyq kommýnıkatsııalar qyzmetinde.

Aldaǵy ýaqytta, 2026-2031 jyldary osyndaı sharalardy Pavlodar munaı-hımııa zaýyty, oblystyq jylý-energetıkalyq ortalyqtary jáne Ekibastuzdaǵy MAES-1 men MAES-2 zaýyttarynda engizý josparlanǵan.

Sonymen qatar, Pavlodarda alǵashqy zamanaýı qoqys suryptaý kesheni salynyp jatyr. Onda plastık, metall, qaǵaz jáne shyny qaldyqtary qaıta óńdeýge tapsyrylady.

– Jobanyń jalpy quny 4,8 mlrd teńge, qýaty 150 myń tonnany quraıdy. Onyń 20%-y plastık pen polımerlerdi óńdeýge arnalǵan. Bul keshen kelesi jyldyń mamyrynda iske qosylady jáne óńirde turmystyq qaldyqtardy tıimdi ári ekologııalyq jolmen qaıta óńdeýge múmkindik beredi, – deıdi A. Baıhanov.

Aıta keteıik, Pavlodarǵa 1 trln teńgeden astam ınvestıtsııa tartyldy. Bul – ótken jylmen salystyrǵanda 1,5 ese kóp. Osy nátıjemen óńir respýblıkada 2-shi orynda tur.