Ekibastuzdaǵy tsıfrlyq alqap 200 gektar aýmaqqa salynady

ASTANA. KAZINFORM – Jasandy ıntellekt jáne tsıfrlyq damý mınıstriniń orynbasary Rostıslav Konıashkın Úkimet otyrysynda Ekibastuzda salynatyn derekterdi óńdeý ortalyqtaryna arnalǵan alqap ınvestorlardy qalaı tartatynyn túsindirdi.

- Derekterdi óńdeý ortalyqtary alqabyn ornalastyrý úshin pılottyq lokatsııa retinde Pavlodar oblysynyń Ekibastuz qalasy tańdaldy. Pavlodar oblysynyń ákimdigi jalpy aýdany 200 gektar bolatyn jer ýchaskesin rezervke qoıyp jatyr. Joba sýmen jabdyqtaý, avtomobıl joldary, telekommýnıkatsııa jáne elektrmen jabdyqtaýdy qosa alǵanda, bazalyq ınfraqurylymdy keshendi túrde júrgizýdi talap etedi, - dedi ol.

Bul alqapqa ınvestıtsııa tartýdyń birneshe modeli qoldanylmaq. Ol modelder ınvestorlardy, tehnologııalyq kompanııalardy jáne bulttyq provaıderlerdi tartýǵa múmkindik beredi.

Birinshi model ınvestorǵa energetıkalyq qýaty aldyn ala rezervtelgen jer ýchaskesin berip, derekterdi óńdeý ortalyǵyn «nólden» salýǵa baǵyttalǵan.

Ekinshi model ınvestorǵa daıyn qurylym men bazalyq ınjenerlik júıeleri bar formattaǵy nysandardy usynady.

Úshinshi model serverlik qýattardy Zero CAPEX prıntsıpi boıynsha jalǵa berýdi kózdeıdi.

Tórtinshi model joǵary ónimdi esepteý klasterlerine jalǵanǵan sýperkompıýter, jasandy ıntellekt jáne bulttyq servısterin usynady.

- Atalǵan modelderdiń jıyntyǵy ınvestıtsııalar men jasandy ıntellekt sheshimderin engizý úshin ámbebap platformany qalyptastyryp, Qazaqstandaǵy jasandy ıntellekt ekojúıesiniń jedel damýyna yqpal etedi.

Birinshi model sheńberinde ınvestorlar úshin qosymsha shart retinde otandyq taýar óndirýshilerdiń ónimderin basym tártippen satyp alý qarastyrylǵan. Investorlar úshin arnaıy ekonomıkalyq aımaq prıntsıpi boıynsha salyqtyq preferentsııalar qarastyrylǵan, - dedi Rostıslav Konıashkın.

Eske salsaq, keshegi Ulttyq quryltaı otyrysynda eldiń birneshe aımaǵynda derekterdi óńdeý ortalyqtaryna arnalǵan alqaptar salynatyny málim bolǵan edi.