Ekibastuzdaǵy Shandaqsor sý qoımasynda balyq qyrylyp jatyr
PAVLODAR. KAZINFORM — Solnechnyı kentiniń turǵyndary GRES-2 sý qoımasynda balyqtardyń jappaı qyrylyp jatqanyn aıtyp, dabyl qaǵyp jatyr. Oqıǵa ornyna arnaıy komıssııa shyqty.
Áleýmettik jelide jarııalanǵan beınejazbada Shandaqsor sý qoımasynyń jıeginde ólip jatqan balyqtardy baıqaýǵa bolady. Ony jergilikti turǵyndar túsirgen.
— Jaǵanyń bári tolǵan óli balyq. Alabuǵa, aqqaıran, kókserke, shortan jáne basqa da balyqtar áldebir jaǵdaıda qyrylyp jatyr. Jaǵajaıdy kúlimsi ıis basyp tur. Bul jaǵdaı sýǵa mıkrosferanyń aralasyp ketýinen bolýy múmkin. Sebebi sý jıegi kóbiktenip, mıkrosferany jaǵaǵa alyp shyǵyp jatqanyn kórip turmyz. Sý janýarlary sodan ýlanǵan, — dep baıandaıdy beınejazbany túsirýshi adam.
Anyqtaǵanymyzdaı, Shandaqsor sý qoımasy № 2 Ekibastuz GRES stansasynyń janynda, Solnechnyı kentinde.
«Zaısan-Ertis oblysaralyq basseındik balyq sharýashylyǵy ınspektsııasy» RMM-niń Pavlodar oblysy boıynsha balyq ınspektsııasy bóliminiń basshysy Samal Temirbolatovanyń aıtýynsha, atalǵan oqıǵa boıynsha oblysta komıssııa qurylǵan.
— Búgin bizdiń mekemeniń, ekologııa, tótenshe jaǵdaılar, veterınarlyq, sanıtarlyq qyzmet organdarynyń mamandary atalǵan sý aıdynyna ketti. Olar kóldegi jaǵdaıdy zerdelep, sýdan synama aldy. Synamalar odan ári zerthanaǵa jiberiledi. Tótenshe jaǵdaı ekologııalyq nemese sanıtarlyq faktorlardan týyndaýy yqtımal. Bizdiń aldyn ala boljamymyz — stansadan ystyq sý quıylyp, sý janýarlary sodan qyrylýy yqtımal. Biraq bul boljam ǵana. Balyqtardyń jappaı qyrylýyna ózge de jaıttar yqpal etýi múmkin, — deıdi Samal Temirbolatova.
Anyqtaǵanymyzdaı, Shandaqsor sý qoımasynda eki paıdalanýshy bar. Biri — GRES-2 kásiporny bolsa, ekinshi bóliginde — janýarlar dúnıesin paıdalanýshy jeke kásipker ornalasqan. Kásipker ár kúzde balyqtandyrýdy júzege asyrady ári jyl saıyn bólingen lımıt boıynsha balyq aýlaıdy. Ótken jyly 53 tonna balyq aýlaǵan. Munda shortan, kókserke, sazan, ońǵaq, taban, móńke, aqqaıran, alabuǵa jáne taǵy basqa balyq túrleri bar. Biraq sý shekaralary arasynda eshbir bóget nemese qorshaý ornatylmaǵan. Stansadan tazartylyp shyǵatyn sýlar Shandaqsorǵa tutasymen aralasyp ketedi.
Eske sala keteıik, Aqtóbedegi Elek ózeninde balyq qyryldy.