Ekibastuzdaǵy Shandaqsor kóline 16 jastaǵy jasóspirim batyp ketti
PAVLODAR. KAZINFORM - Jasóspirimniń denesin izdeýge óńirlik tótenshe jaǵdaılar departamentiniń qyzmetkerleri jumyldyryldy.
Ekibastuz qalasyna qarasty Solnechnyı kentindegi Shandaqsor jasandy kólinde 4 shilde kúni saǵat 16.10 shamasynda 2009 jyly týǵan jetkinshek sýǵa batyp ketken.
- Jasóspirim tyıym salynǵan jerde sýǵa túsken. Qazirgi ýaqytta izdeý boıynsha jumystar jalǵasyp jatyr. Oqıǵa ornyna Pavlodar oblysy tótenshe jaǵdaılar departamentiniń Jedel-qutqarý jasaǵynyń kúshteri - 6 qyzmetker, 2 birlik tehnıka, 2 júzý quraly, sondaı-aq eholot jetkizildi. Qolaısyz aýa raıy, atap aıtqanda ekpindi jel men kól betindegi úlken tolqyndar izdeýge kedergi keltirip tur. Soǵan qaramastan súńgýirler jumystaryn toqtatqan joq, - dep habarlady óńirlik tótenshe jaǵdaılar departamentiniń baspasóz qyzmetinen.
Tótenshe jaǵdaı qyzmetiniń mamandary jabdyqtalmaǵan jerlerde shomylý óte qaýipti ekenin eskertedi. Sýdaǵy qaýipsizdik erejelerin saqtaý – adam ómiri men densaýlyqty saqtaýdyń kepili.
Eske sala keteıik, Pavlodarda kanalǵa shomylýǵa barǵan jasóspirim sýǵa batyp ketti.