Ekibastuzdaǵy saýda ortalyǵynyń tóbesi opyrylýynan 5 adam zardap shekken

PAVLODAR. KAZINFORM - Oqıǵadan soń Ekibastuz qalalyq aýrýhanasynyń qabyldaý bólmesine 5 adam óz betinshe júgingen. Olardyń úsheýi – bala.

Ekibastuzda «Maxi Mall» saýda úıiniń ǵımarat ishinde aspaly tóbe qulap túsýine baılanysty 5 adamnyń zardap shekken anyqtaldy. 

Oqıǵa kezinde «Maxi Mall» saýda ortalyǵynda bolǵan 5 adam Ekibastuz qalalyq aýrýhanasyna óz betinshe júgingen. Olardyń ishinde 2008, 2009 jyldary týǵan úsh bala bar. Zardap shekkenderdi aýrýhanaǵa jatqyzýdyń qajeti bolmady. Dárigerler qarap, alǵan jaraqattaryna ambýlatorııalyq em taǵaıyndaldy, - dep habarlady Pavlodar oblystyq densaýlyq saqtaý basqarmasynan.

Al óńirlik tótenshe jaǵdaılar departamenti oqıǵanyń mán-jaıyn tolyq anyqtaý úshin saýda úıi jabylǵanyn málim etti.

Ekibastuzdaǵy Maxi Mall saýda – oıyn-saýyq ortalyǵy 2007 jyly ashylǵan. Tórt qabatty, jalpy aýmaǵy 28 myń sharshy metr. Ortalyqta kóptegen dámhana-meıramhanalar, sýpermarketter, fýdkort, elektr tehnıkalar dúkeni, kınoteatr, bank fılıaly, balalardyń oıyn alańdary jáne t.b. bornalasqan. Munda aıyna shamamen 300 myńnan astam adam keledi.
Saýda ortalyǵynda buǵan deıin birneshe oqys oqıǵa bolǵan.

2012 jyly ǵımaratqa jarylǵysh qoıyldy degen jalǵan aqparattan 400 adam evakýatsııalanǵan. 
Al 2023 jyldyń qyrkúıek aıynda ondaǵy kıim dúkenderiniń birinde órt shyǵyp, 57 sharshy metr aýmaqty ot shalǵan.

Ǵalamtordaǵy ashyq aqparat kózderine súıensek, Maxi Mall saýda – oıyn-saýyq ortalyǵy «Business Challenge Ltd» JShS-nyń ıeliginde. Kompanııa basshysy Tımerbekova Ásııa Tastymbekqyzy dep kórsetilgen.

Eske sala keteıik, búgin tústen keıin Ekibastuzda «Maxi Mall» saýda ortalyǵynyń ishinde tóbe opyrylyp tústi. Opyrylǵan jerdiń aýmaǵy shamamen 150 sharshy metr.