Ekibastuzdyń iri elektr stantsııalary qysqa daıyndalyp jatyr: Energetıka mınıstrligi baqylaýdy kúsheıtti
ASTANA. KAZINFORM - Energetıka mınıstrliginiń Memlekettik energetıkalyq qadaǵalaý jáne baqylaý komıtetiniń tóraǵasy Erjan Ertaev Pavlodar oblysyna jumys sapary aıasynda Ekibastuz GRES-1 stantsııasyna baryp, aldaǵy kúzgi-qysqy kezeńde elimizdiń iri energııa kózderiniń senimdi jumysyn qamtamasyz etý máseleleri boıynsha kóshpeli keńes ótkizdi.
QR Energetıka mınıstrligi baspasóz qyzmetiniń habarlaýynsha, keńeske «KEGOC» AQ, «Samuryq-Energo» AQ, Ekibastuz GRES-1, Ekibastuz GRES-2, «EEK» AQ, Pavlodar oblysynyń Energetıka jáne turǵyn úı-kommýnaldyq sharýashylyq basqarmasynyń basshylyǵy qatysty.
Keńes barysynda elektr stantsııalarynyń aǵymdaǵy jumys kórsetkishteri, jóndeý baǵdarlamalarynyń oryndalýy jáne jabdyqtardyń paıdalaný senimdiligin arttyrý sharalary qaraldy.
Ótken jylytý maýsymyndaǵy energııa nysandary jumysynyń monıtorıng nátıjelerine erekshe nazar aýdarylyp, sonyń qorytyndysy boıynsha tehnologııalyq buzýshylyqtardy azaıtýǵa jáne jabdyqtardyń turaqty jumysyn arttyrýǵa baǵyttalǵan qosymsha tehnıkalyq jáne óndiristik baqylaý sharalary aıqyndaldy.
Komıtet tóraǵasy Ekibastuz energııa torabyndaǵy júıe quraýshy elektr stantsııalary elimizdiń turaqty energııamen jabdyqtalýy úshin strategııalyq mańyzǵa ıe ekenin atap ótip, olardy daıyndaý máseleleri Energetıka mınıstrliginiń erekshe baqylaýynda ekenin aıtty.
Aldaǵy jylytý maýsymyna daıyndyq aıasynda Ekibastuz GRES-1 stantsııasynda bir energoblok kúrdeli jóndeýdenótip jatyr, Ekibastuz GRES-2-de de bir energoblokta jóndeý jumystary júrgizilý útinde. Óz kezeginde «EEK» AQ bir energobloktyń kúrdeli jóndeý jumystaryn aıaqtady.
-Negizgi mindet – jabdyqtardyń jylytý maýsymyna tolyq daıyn bolýyn qamtamasyz etý. Barlyq jóndeý jumystary kestege sáıkes jáne sapa men senimdilik talaptaryn saqtaı otyryp oryndalýy tıis, – dep atap ótti Erjan Ertaev.
Keńes qorytyndysy boıynsha elektr stantsııalarynyń basshylyǵyna jóndeý jumystarynyń ýaqtyly ári sapaly oryndalýyna jeke baqylaýdy qamtamasyz etý tapsyryldy. Komıtettiń aýmaqtyq departamentine energııa kózderiniń kúzgi-qysqy kezeńge daıyndyǵyna apta saıyn baqylaý júrgizý júkteldi.
Jumys saparynyń sońynda Erjan Ertaev Ekibastuz JEO-syna da baryp, jóndeý naýqanynyń barysy men jylý kóziniń aldaǵy jylytý maýsymyna daıyndyq jumystarymen tanysty.
Osyǵan deıin Úkimette ótken keńeste vıtse-premer Nurlybek Nálibaev jylytý maýsymynyń qalypty ótýin erekshe baqylaýda ustaýdy tapsyrǵan bolatyn.
