Ekibastuzdaǵy kópqabatty turǵyn úılerge 1 qazanǵa deıin jylý beriledi

PAVLODAR. KAZINFORM - Qazirgi ýaqytta Ekibastuz JEO-daǵy №1 týrbınany, №6, №7, №8, №11 qazandyqtardy jóndeý aıaqtaldy. Jylý berý maýsymynda jumysty qamtamasyz etý úshin on qazandyqtyń altaýy 100% daıyn. Úsh qazandyq agregaty iske qosyldy. Bul týraly Pavlodar oblysy ákiminiń baspasóz qyzmeti habarlady.

«Oblys ákimi Asaıyn Baıhanov jumys saparymen Ekibastuz qalasyna baryp, Ekibastuz JEO-daǵy jáne jylýmen jabdyqtaıtyn magıstraldik jelilerdiń jóndeý jumystaryn tekserdi. Óńir basshysy JM-1 jáne JM-3 jylý magıstraldaryn rekonstrýktsııalaý jumystarynyń aıaqtalýyn tekserdi. 28 qyrkúıekke deıin mamandar jelilerdi jýý, toltyrý jumystaryn júrgizedi jáne gıdravlıkalyq synaqtan ótkizedi.

Búgingi tańda kenshiler qalasyndaǵy 79 áleýmettik nysannyń 75-i jáne 702 kópqabatty turǵyn úıdiń 44-i jylýǵa qosylǵan. Al 1 qazanǵa deıin kópqabatty turǵyn úılerdi qosý mindeti qoıyldy», - dep málimdedi baspasóz qyzmetinen.

Al Pavlodar qalasynyń basshysy Hasar Habylbekov jergilikti jylýmen qamtý mekemelerine 30 qyrkúıekke deıin oblys ortalyǵyndaǵy barlyq kópqabatty turǵyn úıge jylý kirýi kerek degen tapsyrma berdi.

Eske sala keteıik, 2022 jyldyń 27 qarasha kúni túngi ýaqytta Ekibastuz JEO-synda apat bolyp, qala turǵyndary jylýsyz qaldy.

Bıyl QR Úkimeti Pavlodar, Ekibastuz jáne Aqsý qalalarynda jylý jelilerin salýǵa 9 mlrd teńge bóldi.

Klebanov pen Kan Ekibastuz JEO-syn qala bıligine ótkizip berdi.